Сирияның солтүстігінде протүріктік топтар мен күрдтер қақтығысып жатыр

Соңғы бірнеше күнде Сирияның солтүстігіндегі Манбидж қаласы қарулы қақтығыстардың орталығына айналды. Күрд қарулы жасақтары Түркия қолдайтын «Сирия ұлттық әскері» (SNA) құрамына кіретін топтардың шабуылдарына тойтарыс беріп жатыр.

8 желтоқсанда Сириядағы адам құқықтарын бақылау орталығының (SOHR) мәліметінше, Анкара қолдайтын топтар «Бостандық таңы» операциясы аясында Манбидж қаласының бірнеше ауданын басып алды. Алайда Сирияның демократиялық күштері (SDF) жетекшілік ететін Манбидж әскери кеңесі бұл мәлімдемелерді жоққа шығарды.

SOHR мәліметі бойынша, қақтығыстар кезінде 26 адам қаза тапты: 17 адам – Әскери кеңес мүшелері, 9 адам – протүріктік күштердің сарбаздары. Алайда нақты құрбандар туралы ақпаратты растау мүмкін емес.

Қараша айының соңында қарулы топтар Сирия президенті Башар Асадтың үкімет күштеріне қарсы ауқымды шабуыл бастаған болатын. Қысқа мерзім ішінде бірнеше ірі қаланы бақылауына алған қарулы альянс 8 желтоқсанда Дамаск қаласына кіріп, Башар Асадтың режимін құлатқанын жариялады.

Ресей Сыртқы істер министрлігінің мәліметінше, Башар Асад президенттік қызметінен кету туралы шешім қабылдап, елден шығып кеткен. ТАСС агенттігінің ақпараты бойынша, Асад отбасымен бірге қазір Мәскеуде.