Сирияда көтерілісшілердің жетекшісі президент болып тағайындалды

"Хайят Тахрир аш-Шам" (ХТШ) қарулы тобының жетекшісі Ахмед Хуссейн аль-Шараа Сирияның өтпелі кезеңдегі президенті болып ресми түрде тағайындалды. BBC Russian қызметінің хабарлауынша, ол жаңа сириялық биліктен толық өкілеттік алып, жаңа конституция қабылданғанға дейін уақытша заң шығарушы кеңес құру міндетін өз мойнына алды.

Сирияның жаңа басшылығы бұрынғы президент Башар Асад режимін құлатуға қатысқан барлық қарулы топтың, сондай-ақ әскери құрылымдар мен арнайы қызметтердің таратылатынын мәлімдеді. Олардың орнына елдің қауіпсіздігін қамтамасыз ететін жаңа құрылым жасақталмақ.

Ахмед аль-Шараа басқаратын ХТШ желтоқсан айының басында көтерілісшілердің шабуылын басқарып, нәтижесінде Башар Асад биліктен шеттетілген болатын.

Ахмед Хуссейн аль-Шараа жастық шағында "Аль-Каида" ұйымының қатарына қосылған. 2006 жылы оны АҚШ әскері Иракта ұстап, бес жылға жуық уақыт түрмеде ұстады. Бостандыққа шыққаннан кейін Сирияда "Аль-Каида" ұяшығын құрды, бірақ уақыт өте келе аталған ұйымнан алыстап, Сириядағы ықпалын күшейтуге ден қойды.

Қазіргі уақытта ол жаңа Сирия ешкімге қауіп төндірмейтінін және "Талибан" басқаратын Ауғанстан сияқты болмайтынын мәлімдеді. Сондай-ақ әйелдер құқығын шектемейтінін және білім беру жүйесінің баршаға қолжетімді болып қалатынын уәде етті.