Сирия әлемге қауіп төндірмейді – Асадты құлатқан көтерілісшілердің жетекшісі

Сирияның іс жүзіндегі көшбасшысы Ахмед әл-Шараа елдің соғыстан әлсірегенін және көршілері мен Батысқа қауіп төндірмейтінін мәлімдеді. Дамаскіде BBC-ге берген сұхбатында ол Сирияға салынған санкцияларды алып тастауға шақырды.

Әл-Шараа екі аптадан аз уақыт ішінде Башар Асад режимін құлатты. Ол – «Хайят Тахрир аш-Шам» (ХТШ) тобының жетекшісі. Бұл топ көтерілісшілер альянсындағы басым күш саналады.

Ол ХТШ-ны террористік ұйымдар тізімінен шығаруды ұсынды. Бұл топ 2016 жылы «Әл-Каидадан» бөлініп шыққаннан кейін БҰҰ, АҚШ, ЕО, Ұлыбритания, Ресей және басқа да көптеген елдер тарапынан террористік ұйым ретінде танылған.

Ахмед әл-Шараа «Хайят Тахрир аш-Шам» террористік ұйым емес екенін айтты. Оның айтуынша, олар бейбіт тұрғындарға немесе азаматтық аймақтарға шабуыл жасамаған. Керісінше, олар өздерін Асад режимінің қылмыстарының құрбаны санайды.

Әл-Шараа Сирияны Ауғанстанға айналдыру ниеті жоқ екенін мәлімдеді. Оның айтуынша, бұл елдер өте әртүрлі, дәстүрлері де өзгеше. Сирияда әйелдердің білім алу қажеттілігіне сенетінін атап өтті.

«Идлибте университеттер сегіз жылдан астам уақыт бойы жұмыс істеп келеді. Менің ойымша, бұл университеттердегі әйелдердің үлесі 60%-дан асады», – деді әл-Шараа.

Сұхбат барысында ол Сирияда алкогольге рұқсат беру мәселесіне қатысты тоқталды.

«Бұл – заң мәселелері, сондықтан менің бұл туралы айтуға құқығым жоқ», – деп жауап берді.

Сирияда жаңа конституция әзірлейтін заңгерлер комитеті құрылатынын, кез келген басшы немесе президент заңға бағынуы тиіс екенін айтты.

Сұхбат барысында азаматтық киім киген көтерілісшілер жетекшісі оның тобы экстремистік өткенінен толықтай бас тартқанын көрсетуге тырысты. Дегенмен көптеген сириялық оған сенбейді. Сирияның жаңа басшыларының алдағы айларда атқаратын әрекеттері олардың елді қалай басқарғысы келетінін көрсететін болады.