Шанхайды су басты: «Дельфин» тайфунынан миллиондаған адам эвакуацияланды

Шығыс Қытай аймағына «Дельфин» жойқын тайфунының келуіне байланысты жергілікті билік миллионнан астам тұрғынды қауіпсіз жерге көшірді. Апат салдарынан Шанхай бастаған ірі шаһарларда көлік қатынасы тоқтап, тек Шанхайдың өзінде 1000-ға жуық әуе рейсі тоқтатылды. Кейіннен тайфун мәртебесі тропикалық дауыл деңгейіне дейін төмендегенімен, синоптиктер су тасқыны мен көшкін қаупі әлі де жоғары екенін ескертуде.

Алғашқыда сағатына 150 шақырым жылдамдықпен соққан дауыл Чжэцзян провинциясы арқылы құрлыққа кірді. Сұрапыл жауын мен қатты желдің кесірінен Шанхай, Цзянсу, Аньхой және өзге де аймақтарда туристік нысандар, соның ішінде Диснейленд пен Леголенд уақытша жабылды. Шанхай көшелерін су басып, тұрғындар тізеден келетін су кешіп жүруге мәжбүр. Ал Вэньчжоу және Тайчжоу қалаларынан жүздеген мың тұрғын эвакуацияланып, уақытша паналау орталықтарына орналастырылды.

Тайфун Қытайға жетпей тұрып, Филиппин, Тайваньның солтүстігі мен Жапонияның Окинава аралына да кері әсерін тигізген. Филиппинде толассыз жауын салдарынан 8 адам қаза тауып, мыңдаған тұрғын эвакуация орталықтарын паналауда. Ал Жапонияда екпінді желден бірнеше адам жарақат алған. Сонымен қатар тайфун әкелген ыстық ауа ағыны Гоконгта аптап ыстық рекордын (36,9°C) тіркеуге себеп болды.

Бұған қоса, Азия елдеріндегі апат аймағында әлеуметтік желілер арқылы жалған ақпарат тарату деректері жиілеген. Қытай полициясы жасанды интеллект арқылы жалған бейнежазба жасап, халық арасында дүрбелең тудырған екі азаматты ұстағанын хабарлады. Мамандардың айтуынша, биылғы «Эль-Ниньо» құбылысы тайфундардың бұрынғыдан да қуатты әрі ұзаққа созылуына ықпал етуде.