Сенат есірткі тасымалдаушыларға жазаны жеңілдететін заңды мақұлдады

Сенат есірткі заттарының заңсыз айналымына қарсы күресті күшейту мақсатында Қылмыстық кодекс пен басқа да заңдарға өзгерістер мен толықтырулар енгізуді мақұлдады.

Заңға сәйкес, алғаш рет есірткі тасымалдаумен ұсталғандарға жазаны жеңілдету қарастырылған. Ал қайталанған немесе ұйымдасқан қылмыс үшін жазалау қатаңдатылып, лауазымды тұлғалар үшін бұл жаза өмір бойы бас бостандығынан айыруға дейін жетуі мүмкін.

Қылмыстық кодекстің 297-бабында есірткі заттарын сақтау, тасымалдау немесе сату үшін жазаның мерзімі 5 жылдан 8 жылға дейін қысқартылды (бұрын 5 жылдан 10 жылға дейін болған). Ірі көлемде жасалған қылмыс үшін жаза 6 жылдан 10 жылға дейін (бұрын 6 жылдан 12 жылға дейін) өзгертілді. Лауазымды тұлғалардың қызметтік жағдайын пайдаланып жасаған қылмысы үшін жаза 15 жылдан 20 жылға дейін ұлғайтылды.

Сондай-ақ 297-1-бап енгізілді, онда есірткі заттарын заңсыз өндіру және өңдеу бойынша жаза 5 жылдан 10 жылға дейін, ал ірі көлемде немесе ұйымдасқан түрде жасалған қылмыс үшін 10 жылдан 15 жылға дейінгі мерзімді қамтиды.

Елде есірткіге тәуелді адамдарды анықтау және оларға бақылау жасау мақсатында психоактивті заттарды қолданумен байланысты психикалық ауытқулары бар тұлғалардың электрондық дерекқоры енгізіледі. Сонымен қатар, медициналық емес мақсатта есірткі заттарын тұтынуға тыйым салынады.