Сауд Арабиясы қажылық маусымында жаңа шектеулер енгізді

Сауд Арабиясы 29 сәуірден бастап қажылық маусымы кезінде Мекке мен Мединаға кіруге қатаң шектеулер енгізді. Бұл шектеулер 10 маусымға дейін, яғни қажылық рәсімдері толық аяқталғанға дейін жалғасады, деп хабарлады Report.

Енді қасиетті қалаларға тек арнайы қажылық визасы бар адамдар ғана кіре алады. Елдің Ішкі істер министрлігінің мәліметінше, рұқсатсыз қажылық жасауға немесе басқа визамен Меккеге кіруге әрекеттенгендерге 20 мың сауд риалына (шамамен 5,3 мың АҚШ доллары) дейін айыппұл салынады.

Бұған қоса, рұқсатсыз қажылық жасауға көмектескен немесе сол үшін виза рәсімдегендерге 100 мың риалға (26 мың АҚШ доллары) дейін айыппұл қарастырылған.

Меккеге заңсыз кірмек болған шетелдіктер елден депортацияланады және Сауд Арабиясына 10 жылға дейін кіруге тыйым салынады. Сонымен бірге қажылық рұқсаты жоқ адамдарды Меккеге тасымалдаған көліктер тәркіленіп, иелері сотқа тартылады.

Сауд Арабиясының Туризм министрлігі қажылық маусымында Меккедегі қонақ үйлер мен басқа да жатын орындарға қажылық рұқсаты жоқ адамдарды орналастыруға қатаң тыйым салынғанын мәлімдеді.

Айта кетейік, биыл Қазақстаннан 4500 адам үлкен қажылық сапарына аттанады. Жоспар бойынша қазақстандықтар 24–31 мамыр аралығында қасиетті сапарға барып, 10–15 маусым аралығында елге оралады.