Ресейдегі зертханашының қазасы: ДДСҰ оба тарау қаупін бағалады

Дүниежүзілік денсаулық сақтау ұйымы (ДДСҰ) Иркутск обаға қарсы ғылыми-зерттеу институтының 28 жастағы қызметкері Дарья Шипилованың қайтыс болуынан кейін Ресейде індеттің таралу қаупі төмен екенін мәлімдеді.

ДДСҰ ресми өкілі Кристиан Линдмайер сарапшылардың бұл оқиғаны жіті бақылап отырғанын жеткізді. Оның айтуынша, қоғамдық денсаулыққа төнетін қауіп Иркутск қаласы үшін «орташадан төмен» деңгейде болса, Ресейдің өзге өңірлері үшін «төмен», ал Еуропа елдері үшін «өте төмен» деп бағаланып отыр.

Оқиғадан кейін марқұммен байланыста болған барлық адамдар анықталып, медициналық бақылауға алынды. Қазіргі уақытта олардың ешқайсысынан қауіпті дерттің белгілері анықталған жоқ.

Бұқаралық ақпарат құралдарының мәліметінше, марқұмның 60-қа жуық әріптесі тест нәтижелері шыққанға дейін зерттеу орталығының ғимаратында оқшауланған. Сонымен қатар аймақтағы бес медициналық мекемеде шектеу шаралары енгізілді.

Ресей Президентінің баспасөз хатшысы Дмитрий Песков тұрғындарды қаңқу сөздерге сенбеуге және тек Ресейдің санитариялық-эпидемиологиялық қызметі (СЭС) және тұтынушылардың құқығын қорғау инспекциясының ресми мәліметтеріне сүйенуге шақырды. Ведомство өкілдері зертханада ешқандай апат болмағанын, жаңадан жұқтырғандар тіркелмегенін хабарлады. Ал 28 жастағы қызметкердің өлім себебі «шығу тегі белгісіз пневмония» деп көрсетіліп отыр.