Непал мен Тибеттегі тасқыннан 160-тан астам адам қаза тапты

Непал мен Тибеттегі алапат тасқын салдарынан қаза тапқандар саны 160-тан асты, жүздеген адам із-түзсіз жоғалғандар қатарында.

Непал полициясының мәліметінше, құтқарушылар үйінділер мен судан 157 адамның денесін шығарған. Қытай жағындағы Тибеттің Джиронг уезінде үш адамның қаза тапқаны расталып, 265 адам із-түзсіз жоғалған.

Жоғалғандар арасында шетел азаматтары да бар. Атап айтқанда, Үндістанның 142, АҚШ-тың 47, Ұлыбританияның 33, Аустралияның 34, Канаданың 24 және Оңтүстік Кореяның тоғыз азаматы іздестіріліп жатыр. Сондай-ақ Малайзия, Нидерланд, Португалия және Оңтүстік Африка Республикасынан барған туристер де жоғалғандар қатарында.

Бастапқыда мұздықтың опырылуына жер сілкінісі себеп болуы мүмкін деген болжам айтылған. Алайда АҚШ Геологиялық қызметінің мәліметінше, сейсмографтар тіркеген магнитудасы 5,2 болатын дүмпулер апаттың себебі емес, керісінше, орасан зор мұз бен тау жыныстарының аңғарға құлауының салдары болған.

БҰҰ Бас хатшысы Антониу Гутерриш Непалдағы зардап шеккен өңірлерге көмек көрсету үшін ұйым қызметкерлері мен қорлары жұмылдырылатынын мәлімдеді.

Қытай төрағасы Си Цзиньпин із-түзсіз жоғалған адамдарды іздеу және құтқару үшін барлық мүмкіндікті пайдалану қазір ең маңызды міндет екенін айтты.