Неліктен The Guardian Илон Масктың X платформасында жарияланымдарды тоқтатты?

Британдық The Guardian басылымы Илoн Маскқа тиесілі X платформасында бұдан былай материалдар жарияламайтынын мәлімдеді. Редакцияның пікірінше, бұрын Twitter деп аталған платформасының артықшылықтарынан кемшіліктері басым.

«Біз оқырмандарымызды The Guardian редакциялық аккаунттарынан X әлеуметтік желісінде бұдан былай жарияланбайтынымыз туралы хабардар еткіміз келеді», - деп хабарлады басылым.

The Guardian X платформасында 27 миллионға жуық жазылушысы бар 80-нен астам аккаунт жүргізеді. Соңғы шешім АҚШ-тағы президенттік сайлау науқанын платформаның қалай жариялағанын талдаудан кейін қабылданды.

«Біз бұл мәселені көптен бері қарастырып келеміз, себебі платформада жиі алға жылжытылатын немесе кездесетін мазмұндар, соның ішінде ультраоңшыл конспирологиялық теориялар мен нәсілшілдік, бізді алаңдатады», - деп түсіндірді The Guardian.

«АҚШ президенттік сайлау науқаны біздің ойымызды тағы да дәлелдеді: X – бұл токсикалық медиа-платформа, ал оның иесі Илoн Маск оның ықпалын саяси пікірталастарды қалыптастыру үшін пайдалана алады», – делінген түсіндірмеде.

The Guardian сонымен қатар X пайдаланушыларының басылымның мақалаларымен бөлісу мүмкіндігі сақталатынын, ал тікелей жаңалықтар репортаждарында X-тен алынған жазбалардың кейде қолданылатынын атап өтті. Журналистер платформадағы жаңалықтарды жинау мақсатында ішкі ережелерге сәйкес пайдалануды жалғастыра алады.

The Guardian-ның X-тен бас тарту туралы шешімі осы платформадағы жарияланымдарды тоқтатқан алғашқы жағдай емес. Өткен жылы National Public Radio (NPR) және PBS платформаның аккаунттарын «мемлекеттік БАҚ» деп белгілегеннен кейін, X-те жарияланымдарды тоқтатты. 

Илон Маск бұл шешімге "The Guardian маңызсыз" және "өткір зұлым насихат машинасы" деп жауап берді.