Мәскеудегі мейрамханада жарылыс болып, кемінде үш адам қаза тапты

Мәскеу орталығындағы Balzi Rossi мейрамханасында жарылыс болып, кемінде үш адам қаза тапты. Ресейдің Ұлттық терроризмге қарсы комитеті 21 адамның әртүрлі дәрежеде жараланғанын хабарлап, оқиғаны лаңкестік әрекет деп таныды.

Жарылыс 1 тамызда Кудрин алаңындағы мейрамханада болған. Ресми мәлімет бойынша, белгісіз әйел ғимаратқа қолдан жасалған жарылғыш құрылғыны алып кірмек болған. Күзетші оны тоқтатқан кезде құрылғы іске қосылған.

Жарылыстан қорапты алып келген әйел, оны мейрамханаға кіргізбеген күзетші және қонақтардың бірі қаза тапқан. Жараланғандарға медициналық көмек көрсетіліп жатыр.

«Коммерсант» дереккөздерінің мәліметінше, әйел қорапты сыйлық ретінде жеткізген және оның ішінде жарылғыш зат барын білмеуі мүмкін. Бомба қашықтан іске қосылды деген болжам айтылды. Құрылғының қуаты шамамен бір келі тротилге тең болған және оған металл шарлар салынған.

Ресейлік ақпарат арналары сол күні мейрамханада Ресей Әуе-ғарыш күштерінің бас қолбасшысы, генерал-полковник Александр Чайконың мерейтойы өтіп жатқанын жазды. Алайда генералдың мейрамханада болғаны және шабуылдың нысанасы болғаны ресми түрде расталған жоқ.

Оқиғаға байланысты Ресей Қылмыстық кодексінің «Лаңкестік әрекет» бабы бойынша іс қозғалды. Құқық қорғау органдары жарылысты ұйымдастырған адамдар мен оның себебін анықтап жатыр.