Қытай роботтарды жаппай шығара бастады. Бұл әлемді қалай өзгертеді?

«Әлем мен ұйықтап жатқанда-ақ көз ілеспес жылдамдықпен өзгеріп жатыр», - дейді 28 жастағы оқытушы Чен Тяньюй.

Жасанды интеллект пен робототехникадан сабақ беретін маман үшін бұл курсивпен жазылған сөз емес, күнделікті нақты шындық. Ол студенттерге ең өзекті бағыттарды үйрету мақсатында бос уақытын толықтай автоматтандыруға көшіп жатқан зауыттарда өткізеді.

Оның дәрісханасында 30-ға жуық студент отыр. Олар индустриялық роботтарды бағдарламалап, медициналық роботтандырылған құралдарды әзірлеуде. «Егер сіз роботтар мен жасанды интеллект әлеміне қажет болмасаңыз, аутсайдерлердің қатарынан табыласыз», - деп ескертеді Чен.

Бүгінде Қытай мемлекеттік деңгейде жаңа технологиялық дәуірді қалыптастыруда. Си Цзиньпин елді инновациялар саласында көшбасшы деңгейге шығарып, АҚШ-пен тікелей бәсекелестікті қамтамасыз ету үшін 20 миллиард доллар бөлген. Технологиялық серпілістің айқын айғағы - Ханчжоу қаласындағы Техникалық институт. Бұрындары империя астанасы болған бұл шаһар бүгінде жаһандық технологиялық хабқа айналған.

Қазiргi таңда Қытай зауыттарында екі миллионнан астам робот жұмыс істейді. Бұл - әлемдегі өндірістік роботтардың жартысынан астамы. Бейжің өз өнімдерін бүкіл әлемге экспорттауда. Сондай-ақ елде екінші мәрте Дүниежүзілік гуманоид-роботтар ойындары өтіп, құрылғылар жүгіру мен бокстан жарысты. Ал зауыттарда бұдан да ауқымды жасырын төңкеріс жүріп жатыр: роботтар дәнекерлеу, сырлау және ауыр жүктерді көтеруді тәулік бойы демалыссыз атқарады.

Чэнду қаласындағы CRP Technology зауытында жаңа манипуляторлар әзірленуде. Бір мұндай робот-қол өндірістегі қайталанатын тапсырмалардың 90%-ын орындай алады. Мұндай жедел автоматтандыруға демографиялық дағдарыс басты себеп болып отыр. 2035 жылға қарай Қытай халқының үштен бірінен астамы 60 жастан асады, ал алдағы онжылдықта жұмыс күші 60 миллионға жуық адамға азаймақ. Роботтар осы алшақтықты толтыруы тиіс.

Дегенмен қауіп те жоқ емес. Елдегі өндіріс саласында 120 миллион жұмысшы бар. Тым жылдам автоматтандыру миллиондаған адамды жұмыссыз қалдыруы мүмкін. Мәселен, Leapmotor электромобиль зауытында престеу, дәнекерлеу мен сырлау 100% автоматтандырылған, ал соңғы тексерісте әлі де адамдар еңбек етеді. Компания басшылығы бұл тапсырмаларды да жақын арада роботтарға беру мүмкіндігін жоққа шығармайды.

Сарапшылардың айтуынша, Қытайда өндірістік база мен қажетті бөлшектерді іздеу экожүйесі өте жылдам дамыған (Шэньчжэньде кез келген компонентті табуға бір сағат жеткілікті). АҚШ ИИ «миын» жасауда көш бастап тұрғанымен, Қытай сол интеллектті миллиондаған машиналарға енгізу жағынан алда келеді.

Ханчжоу институтында студенттер 15 жастан бастап оқытылып, сирек кездесетін металдарды өңдеу мен аэроғарыш саласына баулынады. Жас мамандарды кәсіпорындар алдын ала жұмысқа брондап қояды. Қытайдағы жылжымайтын мүлік кризисі мен мемлекеттік қарыз сияқты экономикалық қиындықтарға қарамастан, ел өндірістік күшін толықтай цифрландыруға көшіп жатыр