Қытай АҚШ-пен TikTok бойынша мәміледен бас тартты

АҚШ Президенті Дональд Трамп Қытайдан келетін тауарларға жаңа баж салығын енгізген соң, Бейжің TikTok-тың америкалық бөлімшесін сату туралы мәмілеге келісім бермейтінін аңғартты. Бұл туралы Reuters және Bloomberg агенттіктері сенімді дереккөздерге сілтеме жасап хабарлады.

Reuters деректеріне сәйкес, мәміле әзірге барлық тараптар — ByteDance (TikTok-тың бас компаниясы), АҚШ үкіметі және жаңа инвесторлар тарапынан мақұлданған болатын. Келісім бойынша, TikTok-тың америкалық активтері АҚШ-та орналасқан жаңа компанияға бөлініп, оның басым бөлігі америкалық инвесторларға тиесілі болар еді. ByteDance бұл құрылымда 20%-дан аспайтын миноритарлық үлеске ие болады деп жоспарланған.

Алайда Трамптың Қытай тауарларына 54%-ға дейін жететін тарифтер енгізуі Пекиннің мәмілеге деген көзқарасын өзгертіп жіберді. Reuters-тің хабарлауынша, Қытай тарапы келісімнің жүзеге асуына тек сауда мәселелері бойынша АҚШ-пен нақты келіссөздер басталса ғана келісім беретінін жеткізген.

4 сәуірде TikTok-тың болашағы бұлдыр тарта бастаған шақта, Дональд Трамп платформаның АҚШ-та жұмыс істеуіне рұқсат мерзімін тағы 75 күнге ұзартатынын мәлімдеді. Ол бұл шешімді Truth Social әлеуметтік желісінде жазды. Президент сонымен қатар Қытай келісімге келсе, тарифтер бойынша жеңілдіктер қарастырылуы мүмкін екенін де жеткізді.

Компания TikTok бойынша АҚШ үкіметімен келіссөздер жүріп жатқанын алғаш рет ресми түрде растады. Олар кез келген келісім Қытай заңнамасына сәйкес бекітілуі керек екенін атап өтті.

2024 жылы АҚШ-тың бұрынғы президенті Джо Байден қол қойған заңға сәйкес, ByteDance TikTok-тың америкалық бөлімін 2025 жылғы 19 қаңтарға дейін сатуы тиіс еді. Дональд Трамп бұл талаптың күшіне енуін екі рет кейінге шегеріп отыр.