Қытай АҚШ-қа жауап ретінде жаңа салықтар енгізді

Қытай билігі АҚШ-тың жаңа кедендік тарифтеріне жауап ретінде бірқатар американдық тауарларға қосымша баж салығын енгізетінін мәлімдеді. ҚХР Қаржы министрлігі 4 ақпанда хабарлағандай, бұл шаралар 10 ақпаннан бастап күшіне енеді.

Қытайдың жаңа баж салықтары келесідей белгіленді:

• 15% – америкалық көмір мен сұйытылған табиғи газға;
• 10% – шикі мұнайға, ауыл шаруашылығы техникасына және кейбір көлік құралдарына.

Сонымен қатар, Пекин Google компаниясына қатысты монополияға қарсы тергеу бастайтынын жариялады.

Бұл шешім АҚШ президенті Дональд Трамптың 4 ақпаннан бастап Қытай, Канада және Мексикадан әкелінетін барлық тауарларға 10%-дық тариф енгізу туралы мәлімдемесінен кейін қабылданды. Трамп бұл шараны Қытайдың есірткі, әсіресе фентанил саудасын тоқтатқысы келмейтіндігімен түсіндірді.

Қытай сауда министрлігі Вашингтонға қарсы "қарымта шаралар" қолданатынын мәлімдеп, Дүниежүзілік сауда ұйымына (ДСҰ) шағым түсірді.

Сонымен қатар, Мексика мен Канадаға қатысты 25%-дық тарифтер уақытша тоқтатылды. Бұл елдер шекаралық бақылау мен қылмысқа қарсы күрес мәселелерінде АҚШ-қа белгілі бір жеңілдіктер жасауға келіскеннен кейін қабылданған шешім.

Енді АҚШ пен Қытай арасындағы сауда соғысы жаңа кезеңге өтті. Еуроодақ та Вашингтонның импорттық тарифтер енгізу қаупіне қарсы қарымта шаралар қабылдауға дайын екенін мәлімдеді.