Қырғызстанда билікті күшпен басып алмақ болғандар ұсталды

Қырғызстанда жаппай тәртіпсіздік ұйымдастырып, билікті күшпен басып алуды жоспарлады деген күдікпен бірнеше адам қамауға алынды, деп хабарлады елдің Ішкі істер министрлігі. 

Мәліметке сәйкес, күдіктілер Бішкек қаласының маңында ұлттық спорт ойындарын өткізу сылтауымен тұрғындарды жиналуға шақырып, конституцияға қайшы үндеулер жариялап, елде тұрақсыздық туғызуды көздеген. Бұл әрекеттер 2024 жылдың 17 қарашасында жергілікті кеңештерге сайлау күнінде билікті күшпен басып алу үшін жасалған.

Қамауға алынғандардың арасында үш шетел азаматы бар, олар Қырғызстанда туған. Қырғызстан ІІМ мәліметінше, екі шетелдік бұған дейін шетелде әскери қақтығыстарға қатысқан. Бірі азаматтарды әскери дайындықтан өткізіп, жаппай тәртіпсіздіктер кезінде құқық қорғау органдарының іс-әрекетін бақылауға жауапты болса, екіншісі – "дрондар мен жарылғыш заттар жасау және қолдану бойынша маман". Тағы бір тұтқындалған адам – Қырғызстанның бұрынғы бас прокурорының орынбасары.

Тергеу барысында күдіктілерден қару-жарақ, оқ-дәрілер және дрондар тәркіленген. Оларға жаппай тәртіпсіздіктерді ұйымдастыруға дайындық, ұйымдасқан топ құру, қаржыландыру, билікті күшпен басып алуға әрекет жасау және шетелде әскери қақтығыстарға қатысу баптары бойынша айып тағылды. Сот шешімімен олардың барлығы 2025 жылдың 10 қаңтарына дейін қамауда болады.

Kloop агенттігінің мәліметінше, ұсталғандар арасында 2021 жылдан бастап бас прокурордың орынбасары қызметін атқарған Кубан Адыл уулу бар. Биыл сәуір айында президент Садыр Жапаров оны қызметінен босатқан.