Қырғызстанда ата-анасын бағып-қағудан бас тартқан азаматтарға айыппұл мен түрме жазасы енгізілді

Қырғызстан президенті Садыр Жапаров ата-анасын асыраудан жалтарған азаматтарға айыппұл мен бас бостандығынан айыруды қарастыратын заңға қол қойды. Бұл туралы Sputnik Қырғызстан хабарлады.

Заңға сәйкес, еңбекке жарамды, кәмелет жасына толған азаматтар еңбекке жарамсыз әрі материалдық көмекке мұқтаж ата-аналарын асырауға төлем жасаудан бас тартуы 12 айдан аспайтын берешек сомасы үшін:

• 20-50 мың сом көлемінде айыппұл салуға;
• 40-100 сағат қоғамдық жұмысқа тартуға;
• 2 айдан 1 жылға дейін түзету жұмыстарына жіберуге әкеледі.

Егер берешек сомасы 12 айдан асып кетсе, жауапқа тарту шаралары қатаңдайды. Мұндай жағдайда:

• 1-3 жылға дейін түзету жұмыстарына;
• 50-100 мың сом көлемінде айыппұл төлеуге;
• 3 жылға дейін бас бостандығынан айыру жазасы қарастырылады.

Егер кәмелет жасындағы еңбекке жарамды балалар табысын жасырып, төмендетсе немесе жұмысқа орналасудан бас тартса, олар:

• 1-3 жылға дейін түзету жұмыстарына;
• 50-100 мың сом көлемінде айыппұл төлеуге;
• 3 жылға дейін бас бостандығынан айырылуы мүмкін.

Бұдан бөлек, жергілікті мемлекеттік әкімшілік пен өзін-өзі басқару органдарына ата-ананың мүддесін қорғау үшін сотқа алимент өндіру туралы талап арыз беру құқығы берілді. Сондай-ақ бұл органдар мемлекет қамқорлығындағы немесе өз бетінше өмір сүретін әрі материалдық көмекке мұқтаж ата-аналарға алимент өндіру туралы сотқа талап қоя алады.