Құрылтай IT мамандарын жасанды интеллект бойынша ұсыныс беруге шақырды

Биыл желтоқсанда цифрландыру және жасанды интеллект мәселелеріне арналған Құрылтай тыңдауы өтеді. Оған дайындық аясында IT және жасанды интеллект саласының мамандары нақты жобалары мен ұсыныстарын жолдай алады, деп хабарлады Құрылтай.

Тыңдауда елдегі цифрландыру деңгейін бағалаумен қатар, экономиканың нақты салаларындағы мәселелерді технология көмегімен шешудің жолдары қарастырылмақ.

«Осы жұмыс аясында еліміздің цифрлық трансформация әлеуетін арттыруға мүмкіндік беретін нақты жобалар мен ұсыныстарды талқылау жоспарланып отыр», – деді Құрылтайдың Цифрландыру, инновациялар және ғылым комитетінің төрағасы Дархан Ахмедиев.

Оның айтуынша, цифрландырудың нәтижесі азаматтардың күнделікті өмірі мен кәсіпорындардың жұмысынан көрінуі керек.

«Өндіріс өсіп, шығындар төмендеп, кәсіпорындардың кірісін арттыру үшін нақты жобалар қажет. Алдағы тыңдауда осы мәселелерді анықтап қана қоймай, оларды шешудің нақты жолдарын ұсынуға тырысамыз», – деді Ахмедиев.

Азаматтар мен сарапшылар 10 қазанға дейін өз жобалары мен ұсыныстарын Құрылтайдың ресми сайты арқылы жолдай алады. Ол үшін сайттың басты бетіндегі арнайы бөлімнен қажетті бағыт бойынша жұмыс тобын таңдау қажет.

11 қазаннан бастап түскен ұсыныстар жұмыс топтарында қаралып, бағыттар бойынша жүйеленеді.

Құрылтай тыңдауы Мемлекет басшысы жариялаған «Цифрландыру және жасанды интеллект жылы» аясында өтеді. Бұған дейін 2029 жылға дейінгі «Digital Qazaqstan» жалпыұлттық стратегиясы бекітілген. Құжат жасанды интеллектіні экономика салаларына енгізіп, өндіріс пен басқа да негізгі секторларды жаңғыртуға бағытталған.