Колумбиядағы 7,4 балдық жер сілкінісінен 130-дан астам адам қаза тапты

Колумбияның батысында соңғы жылдардағы ең қуатты жер сілкіністерінің бірі тіркеліп, ең кемі 132 адам қаза тапты. Ел билігі ұлттық деңгейде төтенше жағдай режимін енгізді, деп хабарлайды BBC.

Магнитудасы 7.4 балдық жер сілкінісі Чоко провинциясында, 103 шақырым тереңдікте тіркелген. Төтенше жағдайдың зардабы жүздеген шақырым аумаққа тарады. Бүлінген ғимараттардың астында қалған азаматтардың болуына байланысты қаза тапқандар саны артуы мүмкін. Сонымен қатар 480-нен астам турғын түрлі жарақат алған.

Жойқын сілкіністен, әсіресе, Перейра қаласы қатты зардап шекті. Мұнда 60-тан астам ғимарат қирап, 40-қа жуық адам көз жұмды. Қаланың кейбір аудандарында түнгі коменданттық сағат енгізілді. Қаза болу және қирау жағдайлары Кали, Манисалес, Кибдо және Меделлин шаһарларында да тіркелді. Сондай-ақ бірнеше өңірлік әуежайлардың инфрақұрылымына зақым келген. Апат дүмпулері көршілес Венесуэла, Эквадор және Панама елдерінде де сезілді.

Жуырда ғана қызметіне кіріскен Колумбия Президенті Абелардо де ла Эсприэлла елде ұлттық апат жағдайын жариялап, зардап шеккен аймақтарға жедел көмек көрсету үшін бюджет қаражатын қайта бөлуге өкілеттік берді. Оның мәліметінше, 1500-ден астам тұрғын үй бүлінген. АҚШ, Еуропалық Одақ және Сальвадор бастаған бірқатар мемлекеттер Колумбияға құтқару операциялары мен зардаптарды жою бағытында халықаралық көмек ұсынды.