Қазақстан мен Ресей арасындағы маңызды жол жаңартылды

«ҚазАвтоЖол» ұлттық компаниясы республикалық маңызы бар «Атырау – РФ шекарасы (Астраханға) автомобиль жолын қайта жаңарту жұмыстарын аяқтағанын хабарлады. Жол учаскесінің ұзындығы – 272 шақырым. Жоба жұмыстары 2018 жылы басталып, Еуропалық қайта құру және даму банкінің несиесі арқылы жүзеге асырылды.

Жолдың қайта жаңартылуы нәтижесінде үшінші техникалық санаттан екінші санатқа ауыстырылды. Жоба аясында әр бағытта ені 3,75 метрден тұратын екі жолақты қозғалысы бар жаңа жол салынды. Сонымен қатар 6 көпір, 1 жолөтпе, 60 су өткізгіш құбыр және 10 демалыс алаңы абаттандырылды. Қауіпсіздікті қамтамасыз ету мақсатында 650 жарық тірегі орнатылды.

Қайта жаңарту жұмыстары халықаралық стандарттарға сәйкес жүргізілді, жобаны Қазақстан, Италия, Түркия және Әзербайжан елдерінің компаниялары жүзеге асырды. Жұмыстарға 650 маман мен 450 бірлік арнайы техника жұмылдырылды. Ақтөбе (Мұғалжар) және Маңғыстау (Шетпе) облыстарынан теміржол арқылы 3,4 миллион тонна инертті материал жеткізіліп, құрылыс барысында қолданылды.

Қайта жаңарту нәтижесінде, бұрын жол жүру уақыты 5 сағатты құраса, енді бүкіл маршрутты 2 сағатта өтуге болады. Жаңа жол жабыны мен заманауи инфрақұрылым аймақтың көлік жүйесін жақсартып, Қазақстан мен Ресей арасындағы байланысты нығайтып, экономиканың дамуына және халықаралық сауданың артуына ықпал етеді.