Израиль Газа халқын басқа елдерге қоныс аудартуға білек сыбана кірісіп жатыр

Израильдің Қорғаныс министрі Исраэль Кац Израиль Қорғаныс күштеріне (ЦАХАЛ) Газа секторының тұрғындарына бұл аймақтан "ерікті түрде кетуге" мүмкіндік беретін жоспар әзірлеуді тапсырды. Бұл туралы ол 6 ақпан күні X әлеуметтік желісінде мәлімдеді.

"Жоспарға шекара бекеттері арқылы шығу мүмкіндігі, сондай-ақ теңіз және әуе бағыттары бойынша арнайы көшіру тетіктері енгізіледі", – деді Кац.

Ол АҚШ президенті Дональд Трамптың бастамасын қолдайтынын атап өтті. Израиль министрінің пікірінше, бұл жоспар Газа секторынан кеткісі келетін палестиналықтарға жаңа мүмкіндіктер береді және оларды қабылдауға дайын елдерге қоныс аударуға көмектеседі. Сонымен қатар ол бұл бастама "демилитаризацияланған Газаны қалпына келтіру" үшін жылдар қажет екенін айтты.

Кацтың айтуынша, ХАМАС Газа тұрғындарын "тірі қалқан" ретінде пайдаланып, олардан гуманитарлық көмек алу жүйесі арқылы ақша бопсалаған және кетулеріне кедергі келтірген.

"Газа тұрғындарына әлемдегі басқа халықтар сияқты еркін қозғалу және көшу құқығы берілуі керек", – деп мәлімдеді ол.

Оның пікірінше, палестиналықтар қоныс аудара алатын елдердің қатарында Испания, Ирландия, Норвегия және Израильдің Газа секторындағы әрекеттеріне қатысты «жалған айыптар таққан» басқа да мемлекеттер бар. Кацтың айтуынша, бұл елдер «заң бойынша» Газа тұрғындарын қабылдауға міндетті, ал егер олар бас тартса, «олардың екіжүзділігі әшкереленеді». Сондай-ақ Кац Канаданы да атап өтті. Оның айтуынша, бұл елдің иммиграциялық бағдарламасы бар және бұрын Газа тұрғындарын қабылдауға дайын екенін білдірген.