Испанияда қола дәуіріне тиесілі қазынаны 4 минут ішінде қолды қылды

Испанияның Аликанте провинциясындағы Вильена археологиялық музейінен қола дәуіріне жататын «Вильена қазынасы» деп аталатын бірегей экспонаттар ұрланды. Құны кемінде 1,7 миллион еуроға бағаланатын алтын әшекейлерді белгісіз кылмыскерлер төрт минутқа жетпейтін уақыт ішінде тонап кеткен, деп хабарлайды News Русская служба.

«Вильена қазынасы» - бұдан 3000 жыл бұрын жасалған алтын, күміс, темір және кәріптастан (янтарь) соғылған 50-ден астам сирек жәдігер. Бұл Еуропадағы қола дәуіріне жататын алтын бұйымдардың ең ірі коллекцияларының бірі болып саналады. Тонаушылар тарихи жәдігерлердің тек алтын бөліктері мен кейінгі кезеңнің құнды заттарын алып, күміс ыдыстар мен кейбір бұйымдарды қалдырып кеткен.

Қала мэрі Фульхенсио Сердан бұл оқиғаны жергілікті тұрғындар үшін үлкен соққы және орны толмас шығын деп бағалады. Оның айтуынша, бағаланған 1,7 миллион еуро - тек алтынның өз құны, ал жәдігерлердің тарихи мәні мен құндылығы шексіз.

Қылмыскерлер тонауды арнайы айла-шарғымен жүзеге асырған. Таңғы сағат 05:16-да қала шетіндегі спорт кешенінде дабыл қағылып, полиция күштері сонда ұмтылған. Сәтті пайдаланған ұрылар 05:20-да музейдің дабыл жүйесін іске қосқанымен, тәртіп сақшылары 05:24-те жеткенше ғимараттан тайып тұрған. Музей заманауи қауіпсіздік жүйелерімен толық жабдықталған. Бейнебақылау камераларына екі көлікпен келген бірнеше адам түсіп қалған. Қазіргі уақытта ауқымды тергеу амалдары жүріп жатыр.