Илон Масктың Starship зымыраны сынақ кезінде атылып кетті

Тарихтағы ең ауыр әрі қуатты зымыран Starship-тің жетінші сынақ ұшуы сәтсіз аяқталды. Бұл туралы жобаны жасаушы SpaceX компаниясы хабарлады.

Зымыран АҚШ-тың Техас штатындағы Бока-Чика ғарыш айлағынан ұшты. Бірінші көп реттік қолданылатын Super Heavy сатысы зымыранды орбитаға шығарып, кейін жерге қайта қонып, старт алаңына аман-есен қонды. Алайда екінші саты, яғни Starship кемесі ажырағаннан кейін барлық алты Raptor қозғалтқышын қосып, ғарышқа көтерілуге дайындық жасағанымен, сегіз жарым минуттан соң онымен байланыс үзілді. Кеме Атлант мұхитына құлап, бөліктерге бөлінген.

SpaceX бастапқы деректерге сүйене отырып, қозғалтқыштың артқы бөлігінде өрт шыққанын және ол құрылымның тез бұзылуына әкелгенін мәлімдеді. Зымыран апатының себебі ретінде оттегі мен отынның қозғалтқыштағы қуыста ағып кетуі айтылуда.

Илон Масктың түсіндірмесі

SpaceX негізін қалаушы Илон Маск бұл ақаудың себептерін тереңірек зерттеп жатқанын хабарлады. Оның айтуынша, ақауларды жою үшін қозғалтқыш бөлігінде өртті анықтау және сөндіру жүйесін орнату, сондай-ақ вентиляциялық тесіктердің аумағын кеңейту жоспарланып отыр. Маск Starship зымыранының сегізінші сынақ ұшуы келесі айда іске асатынын мәлімдеді.

Starship жүйесі

Starship — тарихтағы ең ірі және қуатты зымыран жүйесі. Бұл зымыран жүктер мен адамдарды Жер орбитасына, Айға және Марсқа жеткізуге арналған. Жалпы есептік жүк көтергіштігі — 150 тонна. Жүйе 70 метрлік Super Heavy бірінші сатысы мен 50 метрлік Starship ғарыш кемесінен тұрады.