Илон Маск Трамптан тариф саясатын қайта қарауды сұрады

АҚШ-тың Мемлекеттік тиімділік департаментінің (DOGE) басшысы, кәсіпкер Илон Маск АҚШ президенті Дональд Трампқа тікелей хабарласып, одан тариф саясатын қайта қарауды өтінді. Бұл туралы The Washington Post хабарлады.

Газет дерегінше, өткен демалыс күндері Маск әлеуметтік желілерде Трамптың негізгі кеңесшілерінің бірін — сауда жөніндегі кеңесші Питер Наварроны қатты сынға алғаннан кейін, Трамптың өзіне де тікелей жүгінген.

Ақпарат көздерінің айтуынша, Масктың өтініші әзірге нәтиже берген жоқ. Бұған қоса, сайлауда Трампты қолдаған бизнес пен технология саласының өкілдері жаңа тарифтердің тым жоғары екеніне таңырқап, саясатқа ықпал ете алмағанына көңілі қалған.

Бұған дейін Маск Еуропа мен АҚШ арасында тарифтер мүлдем болмағанын қалайтынын айтқан болатын.

«Менің ойымша, Еуропа мен АҚШ, түптеп келгенде, еркін сауда аймағын құру үшін нөлдік тарифке көшуі керек», – деді Маск Италия вице-премьері Маттео Сальвини ұйымдастырған конгрессте видеобайланыс арқылы сөйлеген сөзінде (CNN).

2 сәуір күні Трамп АҚШ-тың шет мемлекеттермен сауда қатынасына қатысты «өзара» тарифтерді енгізетінін жариялады. Жаңа саясат 185 елді қамтиды. Базалық тариф деңгейі – 10%, алайда кейбір елдер үшін тарифтер жоғары. Мысалы, Қытай үшін – 34%, ЕО үшін – 20%, Қазақстан үшін – 27%.

8 сәуірде Трамп Қытай 34%-дық тарифті жоймаса, оған қосымша 50%-дық салық салынатынын мәлімдеді. Бұл талап орындалмаған жағдайда, қосымша тарифтер 9 сәуірде күшіне енеді.