$ 499.65 € 582.89 ₽ 6.47

Илон Маск АҚШ үкіметіндегі қызметінен кетуі мүмкін

Редакция
22 сәуір 2025 03:31 3641
Илон Маск АҚШ үкіметіндегі қызметінен кетуі мүмкін Сурет авторы: AP Photo / Allison Robbert

Илон Маск АҚШ президенті Дональд Трамптың тапсырмасымен құрылған Үкімет жұмысының тиімділігін арттыру департаментінің (DOGE) кураторы қызметінен кетуге дайын. Бұл туралы The Washington Post басылымы кәсіпкердің жақын ортасына сілтеме жасап хабарлады.

Ақпарат көзінің мәліметінше, Маск соңғы уақытта өзіне бағытталған солшыл саясаткерлердің сынын «жағымсыз әрі әдепсіз шабуылдар» деп атап, оған төтеп беруден шаршаған. Дегенмен кәсіпкердің пікірінше, оның кетуі DOGE жұмысының ауқымына немесе құзыретіне айтарлықтай әсер етпейді, өйткені департаменттің мүшелері ондаған федералды агенттіктерде жұмыс істейді.

DOGE 2025 жылдың қаңтарында Трамптың жарлығымен құрылған болатын. Негізгі міндеті – мемлекеттік шығындарды азайту және федералды агенттіктерді қайта құрылымдау. Маск бұл бастаманың кураторы қызметін атқарып келеді.

Ресми түрде Масктың арнайы мемлекеттік қызметкер ретіндегі өкілеті 30 мамырда аяқталуы тиіс. Axios басылымы мәлімдегендей, АҚШ Конгресінің Өкілдер палатасындағы демократтар Трампқа хат жолдап, Масктың бір жыл ішінде Tesla мен SpaceX секілді жеке компаниялардан толық бас тартпайынша, мемлекеттік қызметке қайта оралуына жол бермейтінін жеткізген.

Politico дерегі бойынша, Трамп наурыз айының соңында министрлер кабинетін Масктың жақын арада қызметтен кететіні туралы алдын ала ескерткен. Дегенмен кей сарапшылар Масктың бейресми кеңесші рөлін сақтап қалуы мүмкін екенін, ал басқалары Трамп пен Масктың байланысы үзілмейтінін болжап жатыр.

Соңғы жаңалықтар