Грузияда тағы да наразылықтар басталды: Еуропалық Одаққа қосылу туралы келіссөздер кейінге қалды

Грузия астанасы Тбилисиде мыңдаған адам премьер-министр Ираклий Кобахидзенің елдің Еуропалық Одаққа (ЕО) қосылу келіссөздерін 2028 жылға дейін кейінге қалдыру туралы мәлімдемесіне қарсы шықты. Наразылар «Грузин арманы» партиясының кеңсесі мен парламент ғимараты алдында жиналды, деп хабарлады BBC-дің орыс қызметі.

Кешкі уақытта полиция наразыларды тарату үшін көз жасаурататын газ, су атқыштар және арнайы құралдарды қолданды. Ішкі істер министрлігі бұл шаралардың заңға сәйкес жүзеге асқанын айтып, наразылардың құқық қорғау органдарына қарсылық көрсеткенін және үш полиция қызметкерінің жарақат алғанын хабарлады.

Наразылық кезінде бірнеше журналист те зардап шеккен. Олардың арасында «Публика», «Пирвели» телекомпаниясы, «Азаттық радиосының» грузин қызметі және «РИА Новости» агенттігінің өкілдері бар.

Бұл мәлімдеме премьер-министрдің Грузия үкіметінің жаңартылған құрамын бекіткеннен кейін жасалды. Ираклий Кобахидзе ЕО-мен келіссөздерді 2028 жылға дейін талқыламайтынын және осы уақытқа дейін Еуроодақтан бюджетке арналған гранттарды қабылдамайтынын айтты. Оның айтуынша, Грузия тек 2028 жылдан кейін экономикалық тұрғыдан келіссөздер жүргізуге дайын болады.

Грузияда жүргізілген сауалнамаларға сәйкес, халықтың 70-80%-ы елдің ЕО-ға қосылуын қолдайды. Өткен жылдың желтоқсанында Грузия ЕО-ға кандидат ел мәртебесін алған болатын. Алайда «шетелдік ықпалдың ашықтығы туралы» заң қабылданғаннан кейін ЕО өкілдері Грузияның одаққа қосылу процесі іс жүзінде тоқтап қалғанын мәлімдеді. Еуроодақ Грузия билігімен байланыстарды азайтып, демократияның құлдырауына байланысты қаржылай көмекті тоқтатты.