Газадағы жаңа келісім: ХАМАС қарусызданып, Израиль әскері шығарылуы мүмкін

АҚШ президенті Дональд Трамп өзі басқаратын Бейбітшілік кеңесі ХАМАС пен Газадағы өзге қарулы топтарды толық қарусыздандыру жөнінде келісімге қол жеткізгенін мәлімдеді. Ол бұл туралы Truth Social желісіндегі парақшасында жазды.

Трамптың айтуынша, келісім кезең-кезеңімен орындалады. Қарулы топтар қаруын тапсырған сайын Израиль әскері Газа секторынан шығарылып, қауіпсіздікті қамтамасыз ету міндеті халықаралық тұрақтандыру күштері мен жаңадан құрылатын Палестина полициясына берілуге тиіс. Кейін аумақты басқару Бейбітшілік кеңесімен жұмыс істейтін жаңа Палестина әкімшілігіне өтпек.

ХАМАС өкілі Ғази Хамад келіссөзге қатысушылар құжат жобасын мақұлдағанын растады. Алайда оның сөзінше, қозғалыс Израиль әскерін біртіндеп шығару, гуманитарлық көмекті кіргізу және Газаны қалпына келтіру жөніндегі міндеттемелер орындала бастағанша қаруын тапсырмайды.

Жоспар бойынша қару Израильге берілмейді. Оны жаңа Палестина комитетінің бақылауына өткізіп, халықаралық органның қадағалауымен сақтау қарастырылған. Келісімді орындаудың егжей-тегжейлі тәртібі кейін әзірленбек.

Дегенмен барлық Палестина топтары келісімді қолдаған жоқ. «Исламдық жиһад» барлық қарулы ұйымдар құжатқа келісті деген ақпаратты жоққа шығарды. Израиль билігі де Трамптың мәлімдемесіне әзірге ресми пікір білдірген жоқ. Reuters мәліметінше, Израиль тарапы ұсыныстың ХАМАС-ты толық қарусыздандыруға кепілдік беретініне күмән келтіріп отыр.

Бейбітшілік кеңесі Газадағы соғысты тоқтату, аумақты қалпына келтіру және өтпелі басқару жүйесін құруға арналған Трамп жоспарының аясында құрылған. Қазақстан президенті Қасым-Жомарт Тоқаев 2026 жылғы қаңтарда Трамптың кеңеске қосылу туралы шақыруын қабылдап, Таяу Шығыста ұзақ мерзімді бейбітшілік орнатуға үлес қосуға дайын екенін мәлімдеген.