Гаджеттерді шамадан тыс пайдалану ағзаның өзгеруіне әкелуі мүмкін

Қазіргі таңда цифрлық технологиялардың адам ағзасына тигізетін әсері ғалымдар мен сарапшылардың жіті бақылауында. Жаңа зерттеулер смартфондар мен басқа да электронды құрылғыларды ұзақ уақыт пайдалану дене бітімінің өзгеруіне, бұлшықет әлсіздігіне және көру қабілетінің төмендеуіне әкелуі мүмкін екенін көрсетіп отыр, деп хабарлайды BBC.

Сарапшылардың пікірінше, смартфонға ұзақ уақыт қарап отырған кезде мойынға түсетін салмақ 27 келіге дейін жетуі мүмкін. «Tech neck» немесе «технологиялық мойын» деп аталатын бұл құбылыс омыртқа дискілерінің зақымдануына, буын мен бұлшықеттердің дегенерациясына, тіпті өкпе көлемінің кішіреюіне әкеп соғуы ықтимал.

Дәрігерлер экранды көз деңгейінде ұстауды және әр жарты сағат сайын 20 минуттық үзіліс жасауды кеңес береді.

Офтальмологтар миопияның (алыстан көрмеушілік) таралуы тек экранға тікелей байланысты емес деп түсіндіреді. Олардың пайымдауынша, мәселе технологияның өзінде емес, адамдардың үй ішінде көп уақыт өткізуінде. Көзге түсетін күшті азайту үшін таза ауада жиі болу керек. Күн сәулесі торқабықта допаминнің бөлінуін ынталандырып, көздің дұрыс дамуына оң әсер етеді.

Тері аурулары бойынша маман Джустин Хэксолл «smart» сағаттарды үнемі тағу терінің ылғалдануына және бактериялардың көбеюіне қолайлы орта туғызатынын ескертеді. Бұл экземаға немесе аллергиялық реакцияларға алып келуі мүмкін. Сондықтан гаджеттерді мезгіл-мезгіл шешіп, теріні тазартып отыру қажет.

Сарапшылар қолдың қысу күшінің әлсіреуі жалпы денсаулықтың нашарлауының белгісі болуы мүмкін деп алаңдайды. Зерттеулерге сәйкес, компьютер алдындағы отырыңқы жұмыс түрі физикалық белсенділіктің төмендеуіне тікелей әсер етеді. Жалпы физикалық дайындықты жақсарту үшін спортпен шұғылдану маңызды.

Германиялық ғалым Себастьян Суггате гаджеттерді шамадан тыс пайдалану ұсақ моториканың дамуына кедергі келтіретінін айтады. Оның пікірінше, адамдар қолмен жасалатын жұмыстардан (музыкалық аспаптарда ойнау, қолөнер, қолмен жазу) алшақтап барады.

Технологияларды толықтай шектеу қажет емес, бірақ күнделікті өмірге қол еңбегін талап ететін іс-шараларды қосу - денсаулықты сақтаудың тиімді жолы.