Эйфель мұнарасы уақытша жабылды: Еуропада адамдар неге жаппай қаза табуда?

Еуропа елдерін жайлаған экстремалды ыстық салдарынан Францияда қайғылы оқиғалар тіркелді. Соңғы күндері салқындау мақсатында суға түскен 40 адам қаза тапты. Бұл туралы Францияның Премьер-министрі Себастьян Лекорню мәлімдеді.

Аптап ыстық Франция, Ұлыбритания, Италия, Испания және Швейцарияны қамтып отыр. Синоптиктердің болжамынша, ауа температурасының рекордтық деңгейге жетуіне байланысты көптеген өңірде «қызыл» ескерту жарияланды. Францияның оңтүстік-батысында ауа температурасы 44,3 градусқа дейін көтеріліп, ел тарихындағы ең ыстық күн ретінде тіркелді.

«Суға кету - үлкен қасірет. Азаматтарды қауіпсіздік ережелерін сақтауға және рұқсат етілмеген жерлерде шомылмауға шақырамын», - деді Премьер-министр Себастьян Лекорню.

Бұған дейін спорт министрі Марина Феррари де тұрғындарды ыстықтан құтылу үшін қауіпті су айдындарында жүзуге болмайтыны туралы ескерткен болатын.

Ыстықтың салдарынан теміржол қатынасында іркілістер болып, мектептер ерте жабылуда. Францияның басты символы – Эйфель мұнарасы да келушілер үшін уақытша жабылды.

Мадридте баспанасыз жүрген және әлеуметтік жағынан осал топтар үшін «климаттық баспаналар» ашылды. Белгияда мектеп емтихандары салқын орындарға ауыстырылды.

Мамандар мұндай ауа райының ұзаққа созылуын «Омега» ауа массаларының блокталуымен түсіндіреді. Дүниежүзілік метеорологиялық ұйым Еуропаның жаһандық орташа көрсеткіштен екі есе жылдам жылынып жатқанын алға тартады.

Қазіргі таңда көптеген еуропалық қалаларда желдеткіштер мен кондиционерлерге деген сұраныс еселеп артты. Ал туристер ыстықтан қашу үшін солтүстік бағыттағы салқындау елдерге сапар шегуді («coolcation») жөн көруде.

Метеорологтар жұма күні Атлант мұхиты жағынан ауа температурасының біртіндеп төмендей бастайтынын болжап отыр.