EО Ресейдің әуе кеңістігінде ұшу қауіпті екенін ескертті

Еуропа Одағының авиация қауіпсіздігі агенттігі (EASA) Ресейдің кейбір аймағындағы әуе кеңістігінде азаматтық авиация үшін қауіп жоғары екенін мәлімдеді. Бұл туралы агенттік 9 қаңтарда жаңартылған қақтығыс аймақтары туралы ақпараттық бюллетенінде хабарлады.

EASA Ресейдің төрт ауданын азаматтық ұшақтар үшін қауіпті әуе кеңістігі ретінде тізімге қосты. Агенттік бұл шешімді Ресейдің Украинаға басқыншылығы жалғасып жатқан шақта қауіпсіздікті қамтамасыз ету үшін қабылдағанын атап өтті.

Санкт-Петербург пен Мәскеуге ұшатын әуекомпаниялар ескерту алған. Құжатта азаматтық ұшақтардың Ресей әуе кеңістігінде әскери және азаматтық авиация арасындағы үйлесімділіктің болмауы немесе қате идентификация салдарынан абайсызда нысанаға айналу қаупі бар екені айтылған.

«EASA 60° шығыс бойлықтан батысқа қарай орналасқан Ресей әуе кеңістігінде барлық биіктіктер мен ұшу деңгейлерінде ұшудан бас тартуды ұсынады», – делінген мәлімдемеде.

Агенттік сарапшыларының айтуынша, мұндай қауіптің мысалы ретінде 25 желтоқсанда Ақтауда Embraer E190 ұшағының құлауы келтірілген. Онда борттағы 67 адамның 38-і қаза тапқан еді.