Әзербайжан Ресейге қарсы халықаралық сотқа шағымданбақ

Әзербайжан билігі AZAL авиакомпаниясына тиесілі Embraer E190 ұшағының апатына байланысты Ресейге қарсы халықаралық сотқа шағым түсіруді жоспарлап отыр. APA агенттігінің хабарлауынша, әуе кемесіне оқ Грозный маңындағы Ханкала елді мекеніндегі әскери база аумағынан атылған.

Әзербайжан тарапы шабуылды кім бұйырғанын, кім атқанын және қандай қару қолданылғанын білетінін мәлімдеді. Қазір осы іске қатысты дәлелдер жиналып, айғақтар әзірленіп жатыр.

«Біз Ресеймен диалог жүргізуге ашықпыз, бірақ Мәскеу өз кінәсін мойындап, жауапкершілік алуы керек. Егер бұл орын алмаса, Баку келесі қадамдарға дайын», – делінген APA таратқан хабарламада.

Сонымен қатар бүгін Әзербайжан билігі Бакудегі «Русский дом» қызметін тоқтату туралы Ресейге нота жолдады. Ресми себеп – ұйымның тіркеуден өтпеуі.