Астанада гардеробта балалар қысылып қалған видеодан кейін мектеп директоры қызметінен босатылды

Астанада №99 мектептің директоры киім ауыстыратын орында оқушылардың қысылып қалған видеосы тарағаннан кейін қызметінен босатылды. Бұл туралы қалалық Білім басқармасы мәлімдеді.

Кең тараған бейнежазбадан киім шешетін орында балалардың сығылысып, кептелісте қалғанын көруге болады. Қолайсыз жағдай екінші ауысымның сабақ кестесіндегі олқылықтар салдарынан орын алған - бір мезетте бірдей жеті сыныптың сабағы аяқталып, оқушылар сыртқы киімдерін алуға жаппай ағылған.

Әлеуметтік желіде ата-аналар мұндай жағдайдың жиі қайталанып тұратынын жазды. Тіпті желідегі хабарлама авторы қысылыста бір баланың құлап, есінен танғанын алға тартқан еді.

«Бейнебақылау камераларындағы жазбаларды тексеру нәтижесінде оқушының есінен танып, құлағаны туралы ақпарат расталмады. Мектеп директоры атқаратын лауазымынан босатылды», - деп хабарлады мемлекеттік орган өкілдері.

Қазіргі уақытта білім беру мекемесінде сыртқы киім қоятын аймақта қызметкерлердің кезекшілігі мен бақылауы күшейтіліп, оқушылардың қауіпсіз қозғалысын қамтамасыз ету бойынша қосымша шаралар қабылданды.