АҚШ USAID бағдарламаларының 83%-ын жабады

АҚШ Мемлекеттік департаменті АҚШ-тың халықаралық даму агенттігінің (USAID) бағдарламаларының 83%-ын жабу туралы шешім қабылдады. Бұл туралы АҚШ мемлекеттік хатшысы Марко Рубио мәлімдеді, деп хабарлады BBC-дің орыс қызметі.

Рубионың айтуынша, 6 200 келісімшарттың 5 200-і жабылады. Осы келісімшарттар бойынша он миллиардтаған доллар жұмсалған, бірақ олар АҚШ-тың негізгі ұлттық мүдделеріне сәйкес келмеген.

Жабылатын бағдарламалар тізімі әлі жарияланған жоқ, бірақ Associated Press агенттігіне сәйкес, 20 маңызды гуманитарлық бағдарлама жабылуы мүмкін. Олардың қатарында:

• Эфиопиядағы миллиондаған адамды азық-түлікпен қамтамасыз ету бағдарламасы;
• Кениядағы балаларды аштықтан емдеу жобасы;
• Сенегалдағы безгекпен күресу бағдарламасы;
• Буркина-Фасоның солтүстігіндегі су жүйесін дамыту;
• Вьетнамдағы мүмкіндігі шектеулі адамдарға көмек көрсету бағдарламасы;
• Мьянмадан келген 100 мың босқынға арналған Тайландтағы ауруханалар.

Сондай-ақ АҚШ-тың СПИД-пен күрес жөніндегі жоспары уақытша тоқтатылды.

Бұған дейін USAID Ресей мен Украинадағы тәуелсіз БАҚ-ты қаржыландыруды тоқтатқан болатын.

USAID – АҚШ-тың тәуелсіз үкіметтік агенттігі, ол сыртқы көмек пен даму бағдарламаларын басқарады. Ол 1961 жылы президент Джон Кеннедидің әкімшілігі кезінде құрылған. 2025 жылы агенттіктің бюджеті 42,8 миллиард долларды құрауы керек еді.

Алайда Дональд Трамп президенттікке кіріскен алғашқы күні-ақ USAID-тің сыртқы көмегін 90 күнге тоқтатты. Осы шешімнен кейін агенттіктің қызметі уақытша тоқтатылды, ал шамамен 10 мың қызметкер мәжбүрлі демалысқа жіберілді немесе жұмыстан босатылды.