АҚШ-та тағамға қосылатын жасанды бояғыштарға тыйым салынуы мүмкін

АҚШ президенті Дональд Трамптың әкімшілігі азық-түлік пен дәрілік заттарда қолданылатын жасанды бояғыштарға тыйым салуды көздеп отыр. Бұл туралы АҚШ Азық-түлік және дәрі-дәрмек сапасы басқармасының (FDA) басшысы Марти Макари мәлімдеді, деп хабарлады AFP агенттігі.

Оның айтуынша, соңғы 50 жылда америкалық балалар уытты синтетикалық химиялық заттардың қоршауында өмір сүріп келеді. Макаридің сөзінше, қант диабеті, онкологиялық аурулар, асқазан-ішек жолы проблемалары және назар тапшылығы мен гиперактивтілік синдромы сияқты аурулар жасанды бояғыштардың әсерінен туындайды.

АҚШ Денсаулық сақтау және әлеуметтік қызмет министрлігінің басшысы Роберт Кеннеди-кіші бұл мәселені "экзистенциялық қауіп" деп атап, қоршаған ортадағы уытты заттардан арылу, таза су мен дұрыс тамақтануды басты бағыт ететінін жеткізді.

АҚШ билігі 2026 жылдың соңына дейін сегіз түрлі жасанды бояғыштан біртіндеп бас тартуды жоспарлап отыр.