АҚШ пен Иран Ормуз бұғазы бойынша келісімге келуге жақын

АҚШ қаржы министрі Скотт Бессент Вашингтон мен Тегеран Ормуз бұғазы арқылы кеме қатынасын қалпына келтіру туралы келісімге жақындағанын мәлімдеді. Оның айтуынша, мәмілеге бүгін немесе ертең қол қойылуы мүмкін.

«Біз Иранмен келіссөз жүргізіп жатырмыз. Келісімге бүгін немесе ертең қол жеткізуіміз мүмкін», – деді Бессент CNBC телеарнасына берген сұхбатында.

Axios басылымының дереккөздері келісімнің 5 тамызда жариялануы мүмкін екенін хабарлады. Басылымның мәліметінше, Иран билігі келісім жобасын мақұлдаған. Әңгіме Иран мен Оман арасындағы 60 күндік уағдаластық туралы болып отыр.

Жобаға сәйкес, Ормуз бұғазы мен Парсы шығанағына кіретін кемелер Иран жағалауы арқылы өтетін солтүстік бағытпен жүреді. Ал бұғаздан шығатын кемелер Оман жағалауына жақын оңтүстік бағытты пайдаланады. Осы кезеңде Иран талап еткен кеме алымдары алынбайды.

АҚШ президенті Дональд Трамп та келіссөздерге оң баға беріп, олардың сәтсіз аяқталуы әскери іс-қимылға әкелуі мүмкін екенін айтты.

Иран әзірге бұл ақпаратқа ресми түсініктеме берген жоқ. Бұған дейін Тегеран келіссөздердің АҚШ-пен емес, Оманмен жүргізіліп жатқанын мәлімдеген болатын.

Ормуз бұғазы арқылы әлемдік мұнай мен сұйытылған газ жеткізілімінің шамамен 20 пайызы өтеді. Биыл наурызда АҚШ пен Израильдің Иранға жасаған соққыларынан кейін Тегеран бұғаздағы қозғалысты шектеген еді.