АҚШ пен Иран бейбіт келісімге келе ме: Швейцарияда не шешілді?

АҚШ пен Иран Швейцарияның Бюргеншток шипажайында өткен шұғыл келіссөздердің алғашқы кезеңін аяқтап, таяу арадағы 60 күн ішінде бейбіт келісімге қол қоюдың «жол картасын» мақұлдады. Қос мемлекет арасында Қатар мен Пәкістан араағайын болып жатыр.

Тараптар биылғы ақпан айындағы әскери соққылардан кейін орнаған уақытша бітім мерзімін тағы екі айға ұзартты. Осы уақыт ішінде арнайы құрылған техникалық жұмыс топтары ядролық бағдарлама, санкциялар және дауларды реттеу мәселелері бойынша қорытынды бейбітшілік шартының жобасын дайындауға міндеттелді. Сондай-ақ Ормуз бұғазында әскери қақтығыстардың алдын алу және коммерциялық кемелердің қауіпсіз өтуін қамтамасыз ету мақсатында тікелей байланыс желісі іске қосылды.

Иран Сыртқы істер министрі Аббас Аракчидің мәлімдеуінше, Тегеран келіссөздер барысында мұнай экспортына қатысты жеңілдіктер алуға, шетелде бұғатталған мемлекеттік активтерінің бір бөлігін қайтаруға және елді қалпына келтіруге бағытталған халықаралық бағдарламаны іске қосуға қол жеткізген. Дегенмен Вашингтон әкімшілігі Иран тарапының бұл мәлімдемелерін ресми түрде әлі растаған жоқ.

Екі ел арасындағы шиеленісті бәсеңдетуге бағытталған бұл кездесу АҚШ Президенті Дональд Трамптың Тегеранға жасаған жаңа қоқан-лоқылары мен Иран тарапының ультиматумдары аясында өтті. Қақтығыстарды тоқтату мақсатында тараптар, сонымен қатар Ливандағы Израиль мен «Хезболла» арасындағы ұрыс қимылдарын тоқтатуды бақылайтын арнайы топ құруға келісті. Швейцариядағы техникалық консультациялар аптаның соңына дейін жалғасады.