АҚШ неге Ресейге баж салығын енгізген жоқ?

АҚШ президенті Дональд Трамп 3 сәуірде шетелден келетін барлық тауарға кедендік баж салығын енгізді. 180-нен астам елге 10%-дан жоғары тариф белгіленді. Алайда бұл тізімде Ресей жоқ болып шықты.

АҚШ Қаржы министрі Скотт Бессент пен Ақ үйдің өкілі Кэролайн Ливитт Ресейге санкциялар салынғандықтан, екі ел арасындағы сауда азайғанын және тариф енгізудің мәні жоқ екенін айтты. Бірақ АҚШ Сауда өкілдігінің дерегіне сәйкес, 2024 жылы екі ел арасындағы сауда көлемі 3,5 млрд долларды құраған. Оның ішінде АҚШ Ресейден 3 млрд долларға тыңайтқыштар, түсті металдар мен химикаттар сатып алған.

Салыстыру үшін: дәл осындай сауда көлеміне ие Қазақстанға 27%-дық баж салығы енгізілсе, Ресей бұл тізімнен тыс қалған. Украинамен сауда көлемі де аз (2,9 млрд доллар), бірақ ол да тарифтік тізімге енген.

DW басылымының жазуынша, санкция салынған Беларусь, Куба, Солтүстік Корея да тізімде жоқ. Ал Херд және Макдональд секілді адам тұрмайтын аралдарға тариф енгізілген.

Саясаттанушы Александра Филиппенконың пікірінше, бұл шешімнің саяси астары бар. Ол Трамптың Ресеймен қарым-қатынасты жақсартуға бейіл екенін көрсетеді деп санайды.

Мәскеу университетінің экономисті Олег Буклемишев те бұл қадамның саяси шешім екенін айтады. Оның сөзінше, АҚШ пен Ресей арасындағы негізгі сауда бағыттары – ядролық отын, тыңайтқыштар және платиноидтар. Дегенмен бұрынғыдай сауда көлемін қайтару енді екіталай, себебі санкциялық шектеулер мен логистикалық кедергілер сақталып отыр.