АҚШ қайтадан Украинаға әскери көмек бере бастады

АҚШ пен Украина арасындағы келіссөздер Сауд Арабиясының Джидда қаласында өтті. Нәтижесінде АҚШ Украинаға әскери көмек беруді қайта жалғастыру, сондай-ақ барлау мәліметтерімен алмасуды қалпына келтіру туралы шешім қабылдады, деп хабарлады Reuters.

Сонымен қатар Украина АҚШ ұсынған 30 күндік бітімді қабылдады. Енді бұл ұсыныс Ресейге жолданады.

"Біз Ресей бұл ұсынысқа тезірек оң жауап береді деп үміттенеміз. Осыдан кейін нақты келіссөздердің екінші кезеңіне көше аламыз," – деді АҚШ мемлекеттік хатшысы Марко Рубио Джиддадағы сегіз сағатқа созылған келіссөздерден кейін.

Президент Владимир Зеленский Сауд Арабиясында болғанымен, келіссөздерге қатысқан жоқ. Алайда ол АҚШ-тың бітімгерлік ұсынысын "оң шешім" деп бағалады.

"Бұл бітім тек әуе мен теңіздегі қақтығыстарды ғана емес, бүкіл майдан шебін қамтиды. Ресей келісім берген жағдайда бұл бітім күшіне енеді," – деді Зеленский.

"Осы 30 күндік «тыныштық» кезеңінде біз серіктестерімізбен бірге сенімді бейбітшілік пен ұзақ мерзімді қауіпсіздікке қатысты барлық мәселелерді жұмыс құжаттары деңгейінде дайындауға уақыт аламыз," – деп қосты Украина басшысы.

Кездесу барысында АҚШ пен Украина қауіпсіздік кепілдіктері мәселесін талқылады. Бұл – Киев үшін негізгі мақсаттардың бірі. Бұған дейін кейбір еуропалық ел Украинаға бітімгерлер жіберу мәселесін қарастыруға дайын екенін мәлімдеген еді.

Еске салсақ, ақпан айының соңында Ақ үйде өткен сәтсіз кездесуден кейін АҚШ Украинаға әскери көмекті тоқтатып, барлау мәліметтерімен алмасуды доғарған болатын. Бұл шешім АҚШ президенті Дональд Трамптың Украина президенті Владимир Зеленскийге Ресеймен бейбіт келіссөздер жүргізуін талап ету мақсатында жасалған еді.