АҚШ билігі шетелдік жұмысшыларға арналған визалық талаптарды қатаңдатпақ

АҚШ Ұлттық қауіпсіздік министрлігі иммиграциялық саясатты қатаңдатуға бағытталған жаңа бастама көтерді. Мекеме жұмысынан айырылған шетелдік білікті мамандарға, оның ішінде H-1B визасының иелеріне елде қалуға мүмкіндік беретін 60 күндік жеңілдік кезеңін (grace period) толығымен жоюды ұсынды. Reuters агенттігінің үкіметтік хабарламаға сілтеме жасап хабарлауынша, аталған ереже жобасы алдағы екі ай бойы қоғамдық талқылаудан өтіп, содан кейін ғана түпкілікті бекітілуі тиіс.

Жоспарланып отырған өзгерістерге сәйкес, H-1B және басқа да уақытша жұмыс визаларымен жүрген шетелдік азаматтар еңбек шартты мерзімінен бұрын аяқталған жағдайда АҚШ аумағынан бірден кетуге міндеттеледі.

Бұл бастама Үндістан мен Қытайдан келетін IT-мамандарға тәуелді АҚШ-тың ірі технологиялық компаниялары үшін үлкен соққы болуы мүмкін. 1990 жылы Конгресс бекіткен H-1B визалық жүйесі жергілікті нарықта тапшы жоғары білікті кадрлардың орнын толтыруға мүмкіндік беріп келген болатын.

Егер жаңа тәртіп күшіне енсе, шектеулер тек H-1B емес, сонымен қатар бірқатар өзге виза санаттарына да қатысты болады. Олардың қатарында:

• E-1 (халықаралық саудагерлер) және E-2 (коммерциялық көлік операторлары);

• L-1 (халықаралық компаниялардың басшылары мен менеджерлері);

• O-1 (ғылым, спорт және өнер саласындағы ерекше қабілетті тұлғалар);

• TN (кәсіби мамандар);

• H-1B1 (Сингапур мен Чили мамандары) және E-3 (Австралия мамандары) визаларының иелері бар.

Ұлттық қауіпсіздік министрлігі бұл қадам босаған жұмыс орындарын АҚШ азаматтарына беруге жағдай жасайды деп есептейді. Ал компаниялар өз қажеттіліктеріне қарай бұл орындарға не білікті америкалықтарды шақыруы, не тиісті I-129 петициясын қайта тапсыруы тиіс.

«Министрлік компаниялар бұл жұмыс орындарын не білікті америкалық жұмысшыларға ұсынады, не еңбек күшіне деген қажеттілігіне қарай I-129 петициясын тапсыру процедурасынан қайта өтеді деп болжайды», - делінген ресми хабарламада.

2017 жылдан бері қолданылып келе жатқан 60 күндік жеңілдік кезеңі шетелдік жұмысшыларға басқа жұмыс табуға немесе елден кетер алдында жеке шаруаларын реттеп үлгеруге мүмкіндік беретін.

Бұл бастама АҚШ Президенті Дональд Трамп әкімшілігінің 2025 жылдың қаңтарында өкімет басына оралғаннан бері заңды иммиграцияны шектеуге бағытталған кезекті қадамы болып отыр. Мұның алдында АҚШ билігі білікті мамандарға арналған визалық алымдарды өсіріп, әлем бойынша өкілдіктерінде иммиграциялық визалық сұхбаттарды тоқтата тұрған болатын.