АҚШ алғаш рет шетел азаматтарының визасын толығымен алып тастады

АҚШ билігі Оңтүстік Судан азаматтарына берілген барлық визаны кері қайтарып, виза беруді уақытша тоқтатты. Бұл туралы АҚШ-тың мемлекеттік хатшысы Марко Рубио мәлімдеді.

«Мен Оңтүстік Суданның паспорт иелеріне берілген барлық визаларды жою туралы шешім қабылдадым. Бұл шешім елге қайтарылған азаматтарды уақытында қабылдай алмаған Оңтүстік Суданның ауыспалы үкіметінің әрекетсіздігіне байланысты қабылданды», – деді Марко Рубио Х әлеуметтік желісіндегі жазбасында.

АҚШ Мемлекеттік департаменті Рубионың мәлімдемесін жариялап, «егер Оңтүстік Судан билігі қажетті деңгейде ынтымақтастық орнататын болса, бұл шешім қайта қаралуы мүмкін» екенін айтты.

Бұл шешім – Дональд Трамп әкімшілігінің белгілі бір мемлекеттің барлық азаматтарына бағытталған алғашқы жаппай шектеу шарасы. Бұған дейін, наурыз айында, АҚШ билігі Куба, Гаити, Никарагуа және Венесуэладан келген 500 мың мигрантты елден шығару жоспарын жариялаған болатын. Алайда ол кезде тек арнайы бағдарлама бойынша келген азаматтар туралы сөз болған.

2023 жылғы мәлімет бойынша, АҚШ-та 133 оңтүстік судандық азамат Уақытша Қорғалған Мәртебеге (TPS) ие болған, тағы 140 адам сол мәртебені алуға құқылы еді. Бұл мәртебе 2025 жылдың 3 мамырына дейін жарамды болатын.

Оңтүстік Судан – 2011 жылы Суданнан бөлініп шыққан мемлекет. Діни (солтүстікте – ислам, оңтүстікте – христиандық) және этникалық (арабтар мен африкалықтар) айырмашылықтар салдарынан елде 2013 жылы азаматтық соғыс басталды. Соғыс салдарынан елді ашаршылық пен эпидемия жайлады. Бүгінде бұл мемлекет – әлемдегі ең кедей елдердің бірі.