Ақ үй Трамптың Газа туралы мәлімдемесін түсіндірді

АҚШ президенті Дональд Трамптың Газа секторына қатысты мәлімдемелері әлемде үлкен сынға ұшырағаннан кейін, Ақ үй әкімшілігі оның айтқандарын түсіндіруге және жұмсартуға тырысты.

5 ақпанда Гватемалаға сапары кезінде АҚШ мемлекеттік хатшысы Марко Рубио Трамптың палестиналықтарды араб елдеріне көшіру туралы мәлімдемесі дұрыстап түсіндірілмегенін айтты. Оның айтуынша, Трамп тек қираған үйлер мен кәсіпорындарды қалпына келтіріп, палестиналықтардың туған жеріне оралуына қолдау білдіруді көздеген.

Ақ үйдің баспасөз хатшысы Кэролайн Ливитт те Трамптың айтқандарын нақтылап, оның «уақытша көшіру» туралы айтқанын жеткізді. Оның айтуынша, АҚШ президенті палестиналықтарды Египет пен Иордания сияқты көрші елдерде уақытша орналастырып, Газа секторын қалпына келтіруді жоспарлаған. Алайда Ливитт бұл жұмыстарды қаржыландыру АҚШ мойнына жүктелмейтінін, сондай-ақ Америка әскері Газа секторына жіберілмейтінін атап өтті.

АҚШ қорғаныс министрі Пит Хегсет өз кезегінде Пентагон аймақтағы қауіпсіздік мәселелерін шешу үшін әртүрлі сценарийді қарастыруға дайын екенін мәлімдеді.

Бұған дейін Трамп АҚШ-тың Газа секторын өз бақылауына алып, оны «Таяу Шығыстың Ривьерасына» айналдыратынын айтқан болатын. Сонымен қатар ол палестиналықтардың басқа араб елдеріне көшуі қажет екенін мәлімдеген. Бұл мәлімдемелер халықаралық қауымдастықтың, соның ішінде Еуропа, Азия және АҚШ саясаткерлерінің тарапынан сынға ұшырады, сондай-ақ араб елдері мен палестиналықтар бұл бастаманы түбегейлі қабылдамады.