Жапонияда шошқаның бүйрегін адамға салып көрмек

Японияда «PorMedTec» стартабы 2028 жылы доңыз бүйрегін адамға ауыстырып отырғызу бойынша елдегі алғашқы клиникалық сынақтарды бастауға дайындалуда. Бұл туралы «The Mainichi» басылымы хабарлады.

Ғалымдар ағзаның жаңа мүшені қабылдамай қою қаупін азайту мақсатында ДНҚ-сы 69 түрлі өзгеріске ұшыраған генетикалық түрлендірілген шошқаларды өсіруде. Алғашқы сынақтар 2028 жылға жоспарланса, 2033 жылға қарай бұл әдісті Жапониядағы стандартты емдеу тәсіліне айналдыру көзделіп отыр.

«Бұл әдісті біз адамнан адамға мүше ауыстыру және диализ терапиясымен қатар, бүйрек жеткіліксіздігінің ауыр түріне шалдыққан науқастарды емдеудің қосымша баламасы ретінде дамытқымыз келеді», - деді стартап президенті Гэндзиро Мива.

Стартап жетекшісінің айтуынша, 2027 қаржы жылының соңына қарай ауруханаларға жақын маңнан шошқа бүйрегін дайындайтын арнайы орталықтар ашылады. Сондай-ақ ұйым 2030 жылы жануардан адамға бүйрек ауыстыруға шартты түрде рұқсат алып, 2033 жылы операцияны медициналық практикаға толық енгізуді мақсат тұтып отыр.

Айта кетейік, бұған дейін қытайлық дәрігерлер әлемде алғаш рет адамға генетикалық түрлендірілген шошқаның бірден үш ағзасын - бауыры мен қос бүйрегін сәтті ауыстырған болатын. Гуанси медициналық университетінің Екінші үлестес ауруханасы зерттеушілерінің мәліметінше, отадан кейін барлық ағза бірден жұмыс істеп кеткен: бауыр бір тәулікке жетпей өт бөле бастаса, бүйректер де өз функциясын тез арада атқаруға кіріскен.

Еске сала кетейік, 2022 жылы АҚШ-та алғаш рет науқасқа гені өзгертілген шошқаның жүрегі қондырылып, ол отадан кейін екі ай өмір сүрген еді. Ал 2024 жылы америкалық хирургтар тірі адамға доңыз бүйрегін ауыстыру операциясын алғаш рет сәтті жүзеге асырған болатын.