Шымкенттің көлік картасы жаңарады: екі жаңа өткел 2026 жылға дейін пайдалануға беріледі

Аталған жобаның барысымен Мәжіліс депутаты, «AMANAT» партиясы фракциясының мүшесі Болатбек Нажметдинұлы арнайы танысты. Депутат бұл өткелдің «AMANAT» партиясының сайлауалды бағдарламасында көрсетілген маңызды міндеттердің бірі екенін атап өтті.
— Шымкент – еліміздегі ең қарқынды дамып келе жатқан қала, сондықтан жол желісін жаңарту – уақыт талабы. Мен осы жобаның бағдарламаға енуіне бастамашы болып, қаржы бөлінуіне ықпал еттім. Қазір құрылыс жоспарға сай жүріп жатыр, нысанды жеке өзім бақылауда ұстаймын, — деді ол.

Өткелде жаяу жүргіншілерге арналған жолақтар мен бағдаршамдар орнатылады. 2024 жылдың қарашасында басталған құрылыстың 50 пайызы орындалды. Мердігер ұйым жұмыстың белгіленген кестеге сәйкес жүргізіліп жатқанын мәлімдеді.

Бұдан бөлек, Тіленшин көшесінде де осындай өткел салынып жатыр. Оның дайындық деңгейі – 20 пайыз. Екі нысан да 2026 жылдың соңына дейін пайдалануға беріледі. Бұл жобалар қаланың шығыс бөлігін орталықпен байланыстырып, көлік ағынын қайта бөлуге және негізгі магистральдердің жүктемесін азайтуға мүмкіндік береді.

Шымкент жолдарын жаңарту бағдарламасы да ауқымды. 2024 жылы жолдардың 75 пайызы жақсы немесе қанағаттанарлық күйде болса, биыл бұл көрсеткіш 90 пайызға жетеді деп жоспарланған. 2026 жылға қарай ұзындығы 1000 шақырымнан асатын 850 көшеге толық асфальт төселмек, оның 540 шақырымы биыл аяқталуы тиіс. 2025 жылы қалада 32 жаңа бағдаршам орнатылып, жол белгілері жаңартылады және реттелмейтін өткелдердің басым бөлігі жарықтандырылады.

Депутаттың өңірге сапары аясында сайлаушылармен кездесулер, әлеуметтік және өндірістік нысандарды аралау, сондай-ақ тұрғындарды жеке қабылдау жоспарланған.