Мұғалімсіз мектеп және ЖИ университеті: Тоқаев технологиялық революцияға жол ашты

Мемлекет басшысы Қасым-Жомарт Тоқаев «Alem.ai» халықаралық жасанды интеллект орталығында болып, елорданың интеллектуалды инфрақұрылымын дамытуға бағытталған бірқатар стратегиялық жобаларды іске қосты.

Сапар аясында жаңа буынның интеллектуалды қалалық инфрақұрылымын құрудың негізі саналатын «Astana Smart City» жобасы ресми түрде іске қосылды. БАӘ-нің «Presight» компаниясының бас директоры Томас Прамотедхам Президентке қаланың барлық деректері мен жүйелерін бір арнаға тоғыстыратын бірыңғай AI-платформасын таныстырды. Бұл жүйе қала басқарудың тиімділігін арттыруға және нақты уақыт режимінде шешім қабылдауға мүмкіндік береді.

Президент еліміздің 14 өңірінде «Tomorrow School» жасанды интеллект мектептерінің желісін іске қосты. Бұл мектептің басты ерекшелігі – мұнда дәстүрлі мұғалімдер мен лекциялар жоқ. Студенттер командада жұмыс істеп, 50-ден астам практикалық жобаны орындау арқылы білім алады. Оқу тегін және 18 жастан асқан барлық азаматтар үшін қолжетімді. Қазірдің өзінде 21 мыңнан астам өтінім түскен бұл жоба жыл соңына дейін бүкіл Қазақстанды қамтиды.

Ғылым және жоғары білім министрі Саясат Нұрбектің айтуынша, «Alem.ai» базасында «AI Research University» зерттеу университеті құрылады. Оқу процесі 1 қыркүйекте басталып, студенттер ұлттық жасанды интеллект инфрақұрылымына (alem.cloud, AlemLLM) тікелей қол жеткізе алады. Сонымен қатар, 12-18 жас аралығындағы жасөспірімдерге арналған «TUMO Astana» орталығы ашылды, онда робототехникадан бастап кинопроизводствоға дейінгі 11 бағыт бойынша креативті дағдыларды меңгеруге болады.

Шара соңында Қасым-Жомарт Тоқаев Астанада өтетін халықаралық «Болашақ ойындары — 2026» турниріне кері санақты бастап берді. Фиджитал-спорт бойынша бірегей жарыс елордамызда 2026 жылдың 29 шілдесі мен 9 тамызы аралығында өтеді.