Қазақстанда аптап ыстықтың жүкті әйелдер мен сәбилердің денсаулығына әсері зерттеледі

Денсаулық сақтау министрлігі БҰҰ-ның Халық қоныстану қорымен (ЮНФПА) бірлесіп, еліміздің бірқатар өңірінде арнайы ғылыми жобаны қолға алады. Салалық ведомство басшысы Ақмарал Әлназарова мен халықаралық ұйым өкілдерінің кездесуінде климаттың ағзаға тигізер ықпалы мен жасөспірімдерге көрсетілетін психологиялық көмекті жетілдіру мәселелері талқыланды.

Жоба аясында экстремалды ауа райының жүкті әйелдер мен жаңа туған нәрестелердің ағзасына тигізетін әсері кешенді түрде зерделенбек. Ғылыми жұмыстар климаты ең ыстық саналатын үш аймақта - Қызылорда, Түркістан және Маңғыстау облыстарында жүргізіледі.

Сонымен қатар тараптар ауылдық жерлердегі жастарға қолдау көрсету бағытын да дамытуды жоспарлап отыр. Жастар денсаулығы орталықтары негізінде қашықтан психологиялық және репродуктивті көмек көрсетудің жаңа тетіктері енгізіледі. Ауыл жастарына сапалы консультация беру үшін өңірлік телепсихология орталықтарын ашу және шалғай елді мекендерге баратын арнайы мобильді мамандар тобын құру ұсынылды.

Министрлік басшысы зорлық-зомбылық, депрессиялық жағдайлар, суицидтік қауіп-қатер, жоспарланбаған немесе ауыр өткен жүктілік пен репродуктивті шығындар кезінде жедел дағдарыстық кеңес беру жүйесін күшейтудің маңыздылығын атап өтті.

Сондай-ақ, елімізде климаттың халық денсаулығына тигізер ықпалын зерделейтін БҰҰ Университеті мен Қоғамдық денсаулық сақтау мектебінің ортақ платформаларын құру көзделуде. Айта кетейік, соңғы бес жылда республикада балаларға көрсетілетін медициналық көмекті қаржыландыру көлемі екі есе артып, саланың жалпы бюджетінің төрттен бір бөлігін құраған еді.