Гемоглобин қалыпты болса да, неліктен үнемі шаршап жүреміз

Қазақстандықтар сараптама қорытындысында ферритиннің жоғары екенін көріп, «ағзада темір тым көп екен» деп өз бетінше диета ұстауды жиі бастайды. Алайда балалар онколог-гематологы Айгерім Берікқызы бұл көрсеткіштің астарында мүлдем басқа себептер жатуы мүмкін екенін ескертті.

Түсінікті тілмен айтқанда, ферритин - бұл ағзадағы темірді жинайтын «қойма» (сейф) іспетті. Бірақ оның тағы бір маңызды қызметі бар: ағзада қандай да бір ауру немесе қабыну басталса, бұл ақуыз «дабыл белгісі» ретінде өзінен-өзі көтеріліп кетеді.

Ферритин неліктен «өтірік» жоғарылап кетеді?

Дәрігердің мәлімдеуінше, ағзада темірдің мөлшері қалыпты, тіпті аз болса да, ферритин деңгейі мынадай жағдайларда күрт өсуі мүмкін:

• Түрлі инфекциялар мен тұмау тигенде;

• Ішкі мүшелерде қабыну үдерісі жүріп жатқанда;

• Бауыр ауруларында;

• Кейбір аутоиммундық және онкологиялық дерттер кезінде.

Мамандардың ескертуі: Жоғары ферритин - бұл нақты диагноз емес. Бұл тек ағзаның ішкі жүйесінде бір кінәраттың бар екенін білдіретін белгі ғана.

Өз бетінше емделу неге қауіпті?

Егер адам ферритин жоғары екен деп, дәрігердің кеңесінсіз темірі бар тағамдар мен дәрумендерден бас тартса, ағзасын нағыз темір тапшылығына (анемияға) ұшыратуы мүмкін.

Сол себепті дәрігерлер нақты диагноз қою үшін тек ферритинге ғана қарамайды. Олар жағдайды анықтау үшін жалпы қан анализін (гемоглобинді тексеру үшін) және ағзада қабынудың бар-жоғын көрсететін С-реактивті ақуызды (СРА) бірге тексереді.

Мамандар анализ қорытындысында ауытқулар болса, өз бетінше әрекет етпей, бірден білікті дәрігер-гематологқа қаралуды ұсынады.