Желіде жалған ақпарат таратқандар заң алдында жауап береді: Бас прокуратураның ескертуі

Қазақстанның Бас прокуратурасы әлеуметтік желі қолданушыларына шұғыл үндеу жасады. Қадағалау органы онлайн-платформаларда араздық қоздыратын және жалған ақпарат тарататын тұлғаларға қатысты заңнамалық шаралар қатаңдатылатынын мәлімдеді.

Бас прокуратураның ресми хабарламасында қоғамдық келісімге нұқсан келтіретін арандатушылық мазмұндағы жазбалар мен пікірлердің көбейгені атап өтілді. Ведомство мұндай әрекеттердің заңсыз екенін ескертіп, құқықтық салдары болатынын еске салады.

Қылмыстық жауапкершілік: ҚР Қылмыстық кодексінің 174-бабына сәйкес, әлеуметтік, ұлттық немесе діни араздықты қоздырғаны үшін 2 мыңнан 7 мың МРП-ге дейін айыппұл салу, белгілі бір мерзімге бас бостандығын шектеу немесе 2 жылдан 20 жылға дейін бас бостандығынан айыру жазасы қарастырылған.

Әкімшілік жауапкершілік: Заңсыз контентті орналастырған немесе таратқан тұлғалар ҚР Әкімшілік құқық бұзушылық туралы кодексінің 456-2-бабы бойынша 20 МРП көлемінде айыппұл төлейді.

Жалған ақпарат: Қасақана жалған мәліметтерді таратқандар Қылмыстық кодекстің 274-бабы бойынша қылмыстық жауапкершілікке тартылады.

Бас прокуратура арандатушылық материалдарды жазған авторлармен қатар, оларды саналы түрде таратқан (репост жасаған, пікір жазған) азаматтар да жауапқа тартылатынын баса айтты.

Құқық қорғау органдары қоғамдық тәртіп пен қауіпсіздікке нұқсан келтіретін кез келген әрекеттің жолын кесіп, заң шеңберінде тиісті шаралар қабылдайтын болады. Бас прокуратура азаматтарды арандатушылыққа бой алдырмауға және тексерілмеген ақпаратты таратпауға шақырады.