Жағаға өзі жүзіп жеткен: Ақжолдың әкесі ұлының қалай аман қалғанын айтты

Каспий теңізіндегі әскери оқу-жаттығудан аман қалған сарбаз Ақжол Темірәлиев жағаға өз күшімен жүзіп жеткен. Одан кейін суға кеткен қарулас жолдасын шамамен жарты сағат іздеген. Бұл туралы сарбаздың ата-анасы блогер Азамат Сәрсенбаевқа берген сұхбатында айтты.

Әкесінің сөзінше, ұлы оқиғадан кейін жансақтау бөлімінде жатқандықтан, онымен небәрі 5–10 минут сөйлесе алған.

«Өзім дұрыстап сұрай алмадым. Жансақтау бөлімінде жатты ғой, маған 5–10 минут қана сөйлесуге, кіріп көруге рұқсат берді. Сонда: «Балам, қалай болды?» деп сұрадым. Жұрт әртүрлі айтып жатыр ғой. Өз аузынан бір-екі ауыз сөз естідім», – деді сарбаздың әкесі.

Оның айтуынша, әскери қызметшілер оқиғаға дейін үш күн бойы тапсырманы орындауға дайындалған.

Ақжол жағаға шыққаннан кейін суға кеткен досын шамамен жарты сағат бойы іздеген. Осы кезде басы айналып, су жұтып қойған.

«Кейін есін жиғанда жедел жәрдем көліктері тұрған. Менің түсінгенім, осында алып келе жатқанда да есінен танып қалған. Бірде есін жиып, бірде қайта есінен айырылған. Кеше видеодан да көрінді, қолында досының береті болды», – деді әкесі.

Бұған дейін әлеуметтік желіде Ақжолдың ауруханада қаза тапқан қарулас досы Мәдіхан Азамат Болатбекұлының беретін қолынан шығармай ұстап жатқан суреті тараған еді.

Әкесінің айтуынша, Ақжол 3 қазанға дейін ауруханада болады. Қазір сарбаздың жағдайы тұрақты. Бұған дейін оның жалпы палатаға ауыстырылғаны, өздігінен жүріп, тамақ ішіп, сөйлеп жүргені хабарланған.

Әкесі қазір ең алдымен ұлының денсаулығына алаңдап отырғанын айтты. Оның оқиғаға қатысты сұрағы көп болғанымен, жақындарынан әзірге барлық сұраққа жауап бермеуді сұраған.

Еске салайық, 24 қыркүйекте Каспий теңізіндегі әскери оқу-жаттығу кезінде 17 әскери қызметшіні ашық теңізге алып кеткен. Үш әскери қызметші аман қалды, 14 әскери қызметші қаза тапты.