Каспийдегі оқиғадан аман қалған сарбаздың жағдайы айтылды

Каспий теңізіндегі әскери оқу-жаттығу кезінде аман қалып, ауруханаға жеткізілген Ақжол Темірәлиевтің жағдайы тұрақты. Ол өздігінен жүріп, тамақ ішіп, сөйлеп жүр. Бұл туралы блогер Азамат Сәрсенбаев Instagram парақшасында жазды.

Оның мәліметінше, сарбаз жалпы палатаға ауыстырылған. Қазір ата-анасына баласының жанында болуға рұқсат берілген.

«Қазір жігіттің жағдайы тұрақты. Өзі жүріп, тамақ ішіп, сөйлеп жүр. Дәрігерлер қолдан келгеннің бәрін жасады. Енді жігітке қалпына келіп, өз-өзіне келу керек», – деп жазды Сәрсенбаев.

Бұған дейін Денсаулық сақтау вице-министрі Манас Рамазанов әскери қызметшінің жағдайы тұрақты екенін және өміріне қауіп жоғын хабарлаған еді.

24 қыркүйекте Каспий теңізіндегі оқу-жаттығу кезінде 17 әскери қызметшіні теңізге алып кеткен. Үш адам құтқарылды, 14 әскери қызметші қаза тапты.