Ұлттық банктен де жоғары табыс: Жеке компаниялар азаматтардың зейнетақы жинағын қалай көбейтіп жатыр?

Қазақстандықтардың зейнетақы жинағын басқаратын жекеменшік компаниялардың барлығы 2026 жылдың алғашқы алты айында Бірыңғай жинақтаушы зейнетақы қорының көрсеткішінен жоғары табыстылық көрсетті. Бұл туралы БЖЗҚ сайтында жарияланған деректерден белгілі болды.

Жыл басынан бері ең жоғары нәтиже «Сентрас Секьюритиз» компаниясына тиесілі – 9,94%. Одан кейін Alatau City Invest – 6,23%, BCC Invest – 5,98%, Halyk Global Markets – 5,88% және Halyk Finance – 5,72% табыстылық көрсеткен.

Tansar Capital компаниясы зейнетақы активтерін басқаруға 2026 жылғы 8 сәуірде кірісті. Содан бергі табыстылығы 1,84% болды. Бұл көрсеткіш өзге компаниялармен бірдей кезеңді қамтымайды.

Ұлттық банк басқаратын БЖЗҚ активтерінің жыл басынан бергі табыстылығы 4,21% болған. Ал алғашқы бес айдағы жиынтық инфляция 5,1%-ды құраған. Осылайша БЖЗҚ-ның қысқа мерзімді табыстылығы сол кезеңдегі инфляциядан төмен қалып отыр.

Қор өкілдері зейнетақы активтерінің жекелеген қысқа мерзімдегі табыстылығы басқару тиімділігін толық бағалауға жеткіліксіз екенін ескертеді. Зейнетақы жинақтары ұзақ мерзімге салынатындықтан, нәтижені бірнеше айдың емес, ұзақ кезеңнің көрсеткіштері бойынша салыстыру қажет.

Қазақстанда азаматтарға зейнетақы жинағының 100%-ын жекеменшік басқарушы компанияларға беру мүмкіндігі қарастырылған. Жинақты басқаруға беру кезінде компаниялардың табыстылығы ғана емес, инвестициялық бағыты, тәуекел деңгейі мен алынатын комиссиясы да ескерілуі керек.

Сонымен бірге келесі жылдан бастап зейнетке шығатын және жинағын БЖЗҚ-дан жеке басқарушыға берген салымшылар үшін табыстылық пен инфляция арасындағы айырманы өтеу тетігі жойылатыны хабарланған.

Жинақты Ұлттық банкте қалдырған жөн бе, әлде жеке басқарушыға сеніп тапсырған дұрыс па? Мақаламыздан оқыңыз.