Үкімет Президент Жолдауларының орындалуы туралы есеп берді: 540 жаңа медициналық нысан ашылды

4 қыркүйекте Астанада Мемлекет басшысы Қасым-Жомарт Тоқаевтың Қазақстан халқына Жолдауы қарсаңында Премьер-Министр мен Үкімет мүшелерінің қатысуымен «AMANAT» партиясы фракциясының кеңейтілген отырысы өтті. Жиында Президент Жолдаулары мен «Әділетті Қазақстан: бәріміз және әрқайсымыз үшін. Қазір және әрдайым» сайлауалды бағдарламасының жүзеге асырылуы талқыланды.

Мәжіліс төрағасы, партия жетекшісі Ерлан Қошанов Жолдаулар елдің стратегиялық бағытын айқындайтынын атап өтті.

«Адамдар нақты өзгерістерді дәл қазір көргісі келеді. Сондықтан біздің ортақ міндетіміз – тапсырмаларды сапалы әрі уақытылы орындау», – деді ол.

Премьер-Министр Олжас Бектенов есеп барысында әлеуметтік-экономикалық дамудағы жетістіктерді баяндады. Оның айтуынша, былтыр құны 1,3 млрд АҚШ долларын құрайтын 45 жоба іске қосылды. Биыл 20 мыңнан астам жұмыс орны ашылатын 190 жаңа өңдеуші кәсіпорын пайдалануға берілмек.

Білім беру саласында «Келешек мектептері» ұлттық жобасы аясында 310 мың орынға шақталған 160 жаңа мектеп салынды. Денсаулық сақтау саласында «Ауылда денсаулық сақтауды жаңғырту» жобасы бойынша өңірлерде 540 медициналық нысан пайдалануға берілді. Бұл шамамен 1 млн ауыл тұрғынын қамтиды.

Инфрақұрылым саласында екі жыл ішінде 12 мың шақырымнан астам инженерлік желі жаңартылып, тозу деңгейі 6,2%-ға төмендеді. Биыл көлік саласында 13 мың шақырым жол жөндеу және салу жұмыстары жүргізілуде. Цифрландыру бағытында IT-қызмет экспорты 2021 жылғы 30 млн доллардан 2024 жылы 700 млн долларға дейін артты.

Жиын соңында Ерлан Қошанов «Ауыл аманаты», «Агросауат» сияқты жобаларды кеңейту, жұмыссыздықты төмендету және тұрғын үй-коммуналдық шаруашылық реформасын аяқтау қажеттігін атап өтті. Сонымен бірге, депутаттар жазғы сапарларда 900 елді мекенде 2000-ға жуық азаматпен кездескенін жеткізіп, халықтың өзекті мәселелерін Үкіметке тікелей жеткізудің маңызын айтты.

Материалды «AMANAT» партиясының баспасөз қызметі ұсынды