Тұрмыстық зорлық-зомбылық жасағандарға рақымшылық жоқ: Парламент жаңа заңды қабылдады

Қазақстан Республикасы Парламентінің Сенаты «Жаңа Конституцияның қабылдануына байланысты рақымшылық жасау туралы» заң жобасын екі оқылымда қарап, мақұлдады. Мемлекет басшысы Қасым-Жомарт Тоқаевтың бастамасымен әзірленген аталған құжат қоғамдағы әділеттілік қағидаттарын сақтауға және азаматтардың қауіпсіздігін қамтамасыз етуге бағытталған.

Заң нормаларына сәйкес, рақымшылық шаралары қылмыстық теріс қылықтар, онша ауыр емес және орташа ауырлықтағы қылмыстар үшін жазасын өтеп жатқан тұлғаларға қолданылуы мүмкін. Дегенмен, құжатта ауыр және аса қауіпті қылмыс түрлері үшін рақымшылық жасауға қатаң тыйым салынған.

Мемлекеттік саясаттың отбасылық-тұрмыстық зорлық-зомбылыққа қарсы іс-қимыл бағытындағы қатаң ұстанымы рақымшылық туралы заңда да көрініс тапты. Атап айтқанда, заңнамаға сәйкес, тұрмыстық зорлық-зомбылық көрсеткен тұлғалар («үй тирандары») рақымшылыққа ілінбейді. Сондай-ақ, рақымшылық коррупциялық қылмыс, терроризм, экстремизм, зорлау, азаптау, кісі өлтіру және мемлекетке опасыздық жасау баптарымен сотталған тұлғаларға да қолданылмайды.

Заң аясында Қазақстан тарихында алғаш рет әкімшілік амнистия енгізіліп отыр. Ол азаматтардың, оның ішінде жеке кәсіпкерлердің орындалмаған әкімшілік айыппұлдарын кешіруді көздейді. Алайда, бұл жеңілдік қоғамдық қауіпсіздікке және азаматтардың өміріне қатер төндіретін құқық бұзушылықтарға таралмайды.

Барлық рәсімдер «Әкімшілік құқық бұзушылықтардың бірыңғай тізілімі» (ЕРАП) жүйесі арқылы толық автоматтандырылған форматта жүзеге асырылады. Бұл бюрократиялық кедергілерді жойып, рақымшылықтың әділ әрі ашық өтуін қамтамасыз етеді.